Golow a Splann War Vebyon Ysrael

1Byttegyns yth esa dhe'th pobel sans golow pur vras.

Aga eskerens a glewas aga lev mes ny welsons aga furv,

ha rekna aga honan lowen drefenn na wodhavsens,

2ha godhvos gras nag esens ow kul drog dhedha, kyn fiens dregynnys kyns;

hag i a hwilas aga gevyans drefenn aga bos eskarek dhedha.

3Yn le tewlder ty a ros dhedha koloven a dan ow leski

avel gidyer rag vyaj ankoth dha bobel,

ha profya dhedha howl hwar war aga vyaj gloryus.

4Rag aga eskerens a dhervynnas may fe golow gwithys dhiworta ha may fons prisonys yn tewlder,

an re a withsa dha vebyon yn kethneth,

dredha may fia golow anvarwel an lagha res dhe'n bys.

Mernans an Re Gynsa-genys a'n Ejyptianys

5Wosa i dhe evira ladha babanes dha bobel sans,

hag unn flogh re bia gesys a-ves ha sawys,

yn kessydhyans ty a gemmeras dhe-ves routh a'ga fleghes;

ha ty a's distruis oll war-barth gans liv krev.

6An nos na a veu gwrys godhvedhys dhe gyns dh'agan tasow,

may lowenhahens yn godhvos sur a'n tiow may trestsons ynna.

7Yth esa dha bobel ow kortos delivrans an re wiryon,

mes distruyans aga eskerens.

8Rag der an keth fordh may kessydhsys agan eskerens

ty a'gan gelwis dhis ha'gan glorifia.

9Rag yn-dann gel fleghes wiryon tus dha a wrug sakrifisow,

ha gans unn akord i a assentyas dhe'n lagha dhuwel,

may rannens an syns yn kepar maner an keth taklow,

bennathow ha peryllow;

ha seulabrys yth esens ow kana kanow gormel koth aga thasow.

10Mes kri anhwek aga eskerens a dhassonas,

ha'ga hynvann pitethus rag aga fleghes a veu lesys a-les.

11An mester ha'n keth a veu kessydhys gans an keth vreus,

ha'n den kemmyn ha'n myghtern a wodhevis an keth koll;

12hag i oll war-barth, der unn eghenn mernans,

a's tevo korfow diniver.

Nyns o an re vew lowr dh'aga ynkleudhyas,

rag yn unn pols aga agh an moyha enorys re bia distruys.

13Rag kyn na vynnsens krysi travyth dre reson aga husow,

hwath, pan veu aga re gynsa-genys distruys, i a aswonnis bos dha bobel mab Duw.

14Rag pan esa pup-tra yn taw kosel,

ha'n nos yn kres hy resegva skav,

15dha er ollnerthek a lammas dhiworth nev yn-mes a'n tron ryel,

a-bervedh yn kres an tir a dhistruyans,

kasor asper ow toen kledha lymm dha worhemmynn gwiryon,

16hag ev a sevis ha lenwel pup-tra oll gans mernans,

ha tochya nev hag ev ow sevel war an norvys.

17Ena a-dhesempis tarosvannow yn hunrosow euthyk a's troblas yn feur,

hag euth anwaytys a dheuth warnedha;

18hag onan omma hag onan arall ena, tewlys yn-nans hanter marow,

a dhiskwedhas dhedha prag yth esens ow merwel;

19rag an hunrosow a's troblas a's darwarnyas a hemma,

ma nag ellens dhe goll heb godhvos prag yth esens ow kodhevel.

Godros a Dhistruyans y'n Difeyth

20An prevyans a vernans a dochyas ynwedh an re wiryon,

ha pla a dheuth war an routh y'n difeyth,

mes an sorr ny dhuryas pell.

21Rag gour divlam a fistenas dhe vos aga mentenour;

ev a dhros yn-rag skoes y venystri,

pysadow hag offrynn ynkys;

ev a sevis orth an sorr ha gorra diwedh dhe'n terroesa,

ow tiskwedhes y vos dha was.

22Ny fethas ev an sorr gans nerth y gorf,

na gans fors arvow,

mes der y er ev a fethas an kessydhyer,

ow ri dhe'n kov tiow hag ambosow res dh'agan tasow.

23Rag pan goedhsa seulabrys an re varow an eyl war y gila yn bernyow,

ow sevel yntredha ev a skonyas an sorr,

ha treghi dhe-ves y fordh dhe'n re vew.

24Rag war y dhillasenn hir yth esa liwys an bys oll,

hag yth esa gravys war an peswar rew a veyn glori an tasow

hag yth esa dha veuredh war an diadem war y benn.

25Dhe'n re ma an distruer a omblegyas, hag ev a borthas own anedha;

rag lowr o unnweyth i dhe brevi an sorr.