An Mor Rudh

1Mes sorr dibita a dheuth war an re dhidhuw bys y'n diwedh,

rag Duw a ragwodhya an pyth a wrussens;

2fatell vynnsens, kyn hassens dha bobel dhe dhiberth

ha'ga dhannvon dhe-ves yn fysk,

treylya aga howsesyow ha'ga helghya.

3Rag pan esens hwath ow kyni,

hag ow kul kynvann orth bedhow aga re varow,

i a geworras tybyans foll arall,

ha helghya avel fowesigyon an re a byssens ha konstryna dhe asa.

4Rag an denkys a dhendilsons a's tennas yn-rag bys y'n diwedh ma,

ha gul dhedha ankevi an pyth re hwarvia,

may astiverrens an pyth a fyllis a'ga thormentys,

5ha may tremenna dha bobel aga honan fordh varthusek,

mes i aga honan a gaffa mernans ankoth.

Duw a Gevarwoedh ha Gwitha y Bobel

6Y'n dydhyow na kreasyon oll war-lergh y natur y honan esa ow pos nowydh formys,

ow servya dha worhemmynnow,

may fe dha fleghes gwithys dibystik.

7An gommolenn a veu gwelys ow korskeusi an kamp,

ha tir sygh owth omdhiskwedhes yn tyller may savsa dowr kyns,

fordh heb lett yn-mes a'n mor rudh,

ha plen gwelsek yn-mes a'n tonnow freudhek,

8dresto may tremenas avel unn genedhel an re a veu gwithys dre dha leuv,

wosa mires war dha varthusyon marthys.

9Rag i a beuris kepar ha mergh,

ha terlemmel avel eyn,

orth dha wormel jy, A Arloedh, neb re's delivras.

10Rag hwath i a berthi kov a hwarvosow aga godrik,

fatell wrug an dor dri gwibes yn-mes yn le enyvales,

hag yn le puskes an avon a hwyjas yn-mes routh vras a gwilkynyow.

11A-wosa i a welas eghenn nowydh a ydhyn,

pan y's ledyas desir dhe wovynn boes dentethyel;

12rag, dhe walgha aga desir, rynki a dheuth yn-bann dhiworth an mor.

Kessydhyans an Ejyptianys

13Ny dheuth an kessydhyansow war an beghadoryon

heb toknys kyns yn freudh taran,

rag i a wodhevis yn ewn dre reson a'ga drogoberow;

rag i a dhevnydhya kas moy kales troha estrenyon.

14Tus erell a skonya degemmeres tus na aswonnens a dho dhedha,

mes an re ma a wrug kethyon a westoryon o aga masoberoryon.

15Ha moy, kessydhyans a neb eghenn a dheu war an re na,

a-ban dhegemmersons estrenyon yn eskarek;

16mes an re ma, wosa i dh'aga degemmeres gans gwledhow,

i a blagyas gans godhevyansow euthyk

an re a gevrennsa seulabrys an keth reythyow gansa.

17I a veu gweskys ynwedh gans dellni,

kepar dell veu an re orth daras an den gwiryon,

pan esens kyrghynnys gans tewlder tew

pubonan ow hwilas y dharas y honan.

Elvennow a Janjyas rag Mebyon Ysrael

18Rag an elvennow a janjyas aga thylleryow an eyl gans y gila,

kepar dell wra an sonyow war delynn varya gnas an resyas,

kyn hwyth pub son y don y honan.

Hemma a yll vos gwelys yn kler pan virir orth an pyth a hwarva.

19Rag yth esa enyvales an syghtir ow pos treylys dhe re dhowrek,

hag yth esa an re ow neuvya ow tremena war dir.

20Tan a withas y nerth y honan hwath yn dowr,

ha dowr a ankovas y alloes dhe dhifeudhi.

21Flammow, yn kontrari, a fyllis dhe gonsumya

kig kreaturs podradow a gerdhi yn aga mysk,

ha ny deudhis an boes nevek, hag a deudhis kepar ha rew.

22Rag yn pup-tra, A Arloedh, ty re veurhas ha glorifia dha bobel;

ha ny fyllsys dh'aga gweres pup-prys hag yn pub tyller.