Tenkys an Re Wiryon

1Mes yma enevow an re wiryon yn leuv Duw;

ny wra torment nevra aga thochya.

2Yn golok tus diboell, yth hevelis i dhe vos marow,

ha'ga thremen a veu akontys anfeusi,

3ha'ga dibarth dhiworthyn kepar dell ve terroes.

Mes ymons yn kres.

4Rag mar fons i kessydhys yn golok tus,

hwath aga govenek yw leun a anvarwoleth.

5Kyn fons nebes keredhys, i a dhegemmer meur a dhader,

rag Duw a's provas ha'ga havoes wordhi anodho y honan.

6Ev a's provas avel owr yn forn,

hag avel offrynn kowlleskys ev a's degemmeras.

7Yn termyn aga breus, splanna a wrons,

hag avel gwryghon yn sowl i a boen a-dro.

8I a vreus kenedhlow ha rewlya poblow,

ha'n Arloedh a reyn warnedha bys vykken.

9Kemmys a fydh ynno a gonvedh gwirder,

ha'n re yw len a drig ynno yn kerensa,

rag yma gras ha tregeredh dh'y dus dhewisys.

Tenkys an Debeles

10Mes an re dhidhuw a vydh kessydhys dell dhervynn aga resna,

an re hag a skonyas an re wiryon

ha rebellya erbynn an Arloedh;

11rag kemmys a dhispres furneth ha dyskans yw truan.

Aga govenek yw koeg, aga lavuryow yw diles,

ha'ga oberow euver.

12Aga gwragedh yw foll, ha'ga fleghes yw drog;

13milliges yw aga agh.

A-dro dhe Anvabeth

Rag gwynnvys yw benyn anvap yw andhefolys,

neb na entras yn unyans peghus;

hi a gyv frut pan hwither Duw enevow.

14Gwynn y vys ynwedh yw an spadhesik neb na wrug drogober gans y dhiwla,

na devisya droktaklow erbynn Duw;

rag favour arbennik a vydh diskwedhys dhodho rag y lelder,

ha tyller a dhelit meur yn tempel an Arloedh.

15Rag frut lavuryow da yw gerys-da,

ha ny wra an wreydhenn a gonvedhes fyllel.

16Mes ny dheu mebyon avoutroryon, dh'aga adhvetter,

ha has unyans anlaghel a verow.

17Rag kyn fewons hir, hwath i a vydh akontys mann,

ha wortiwedh aga henys a vydh heb enor.

18Mar ferwons yowynk, ny's tevydh govenek,

na konfort yn dydh breus.

19Rag euthyk yw diwedh an henedh kammhynsek.