1Gwell yw anvabeth gans vertu,

rag yn kov a vertu yma anvarwoleth,

drefenn hy bos aswonnys gans Duw ha gans tus.

2Pan usi hi yn aga lok, tus a wra war hy lergh,

ha pan yw gyllys i a yeun war hy lergh;

ha der an oesow hi a geskerdh, kurunys gans trygh,

tryghores yn kesstrif an pewasow andhefolys.

3Mes ny sewen routh an re dhidhuw gans aga askorr pals,

na ny wra nagonan a'ga flansigow direyth kavoes gwreydhenn dhown,

na kavoes dalghenn fast.

4Rag kyn teffo skorrennow rag termyn,

ow sevel yn teantell, i a vydh shakys der an gwyns,

ha dre nerth an gwyns i a vydh diwreydhys.

5An skorrennow a vydh terrys dhe-ves kyns i dhe vos leun devys,

ha'ga frut a vydh diles,

anadhves rag dybri, da rag mann.

6Rag fleghes genys a unyans anlaghel

yw dustunioryon a dhrog erbynn aga herens pan y's hwither Duw.

7Mes an den gwiryon, kyn farwo a-varr,

hwath y fydh yn powesva.

8Rag nyns yw kothni enorys rag hirder a dermyn,

na musurys dre niver a vlydhynyow;

9mes konvedhes yw blew loes rag tus,

ha bewnans divlam yw kothni hir.

10Yth esa gour plegadow dhe Dhuw, ha kerys veu ganso,

ha trigys yn mysk peghadoryon ev a veu kemmerys yn-bann.

11Ev a veu kechys yn-bann ma na ylli kammdreylya y gonvedhes

ha na ylli gil toella y enev.

12Rag an hus a dhrog a dewlha taklow da,

ha desir siansek a gammdreyl an brys sempel.

13Yn termyn berr ev a dheuth dhe perfydhder oes leun y vlydhynyow;

14rag y enev o plegadow dhe'n Arloedh;

rakhenna ev a fistenas dh'y gemmeres dhe-ves dhiworth an kres a dhroktra.

Hwath an bobel a welas ha ny gonvedhsons,

na kemmeres tra a'n par ma y'n brys,

15bos gras ha tregeredh Duw gans y dus dhewisys,

hag ev a with war y re sans.

Trygh an re Wiryon

16An den wiryon marow a dhampen an re dhidhuw usi ow pewa,

ha yowynkneth gwrys perfydh yn skon a dhampen kothni hir an den kammhynsek.

17Rag i a wel diwedh an den fur,

ha ny gonvedhons an pyth re dhevisyas an Arloedh ragdho,

ha dhe by entent ev re's gwithas saw.

18I a wel, ha'y dhispresya,

mes an Arloedh a's skorn, ow hwerthin orta.

Wosa hemma i a dheu ha bos korfow disenorys,

hag outray yn mysk an re varow bys vykken;

19drefenn ev dh'aga thewlel dilavar dhe'n dor,

ha'ga shakya dhiworth an selyow;

i a vydh difeythys glan,

hag i a vydh yn angoes,

ha'n kov anedha a wra mos dhe goll.

An Vreus Finek

20I a dheu gans euth pan vydh aga feghosow akontys,

ha'ga drogoberow a's dampen dh'aga fas.