1Ena an den gwiryon a sav gans fydhyans meur

yn golok an re re'n plagyas,

ha'n re na wrug vri a'y lavuryow.

2Pan y'n gwelons, i a vydh shakys gans own euthyk,

hag i a's teves marth orth an selwyans anwaytys.

3I a gews an eyl dh'y gila yn edrek,

hag yn angoes an enev i a gyn, ha leverel,

4‘Hemm yw an den a synsyn yn ges y'n termyn eus passys

ha'y wul ensampel a geredh. Ass en ni fellyon!

Ni a dybi bos y vewnans muskogneth

ha bos y dhiwedh heb enor.

5Prag y feu reknys yn mysk mebyon Duw?

Ha prag usi y rann yn mysk an syns?

6Ytho ni a wandras dhiworth an hyns a wiryonedh,

ha ny splannas golow ewnder warnan,

ha ny dhrehevis an howl warnan.

7Lenwys veun a hynsyow anlaghedh ha distruyans,

ha ni a vyajyas dre dhifeythtiryow heb fordh,

mes ni re beu heb godhvos a fordh an Arloedh.

8Py les o agan balghder dhyn?

Ha py dader a wrug agan rychys balgh dri dhyn?

9‘Oll an taklow na re dremenas dhe-ves avel skeus,

kepar ha kannas hag a fisten dreson;

10avel gorhel hag a woel dre donnow an dowr,

ha pan yw tremenys ny yllir kavoes ol vyth,

na hyns a'n keyn-lester y'n tonnow;

11po avel edhen, pan nij der an ayr,

ny gevir prov a'y thremen;

an ayr skav, gweskys dre strokosow hy eskelli

ha rynnys dre nerth hy nij ow fyski,

yw treusys dre wayans hy eskelli,

hag a-wosa nyns eus tokyn vyth a'y devedhyans dhe vos kevys ena;

12po kepar ha pan vo tennys seth orth kostenn,

an ayr, wosa bos rynnys, a dheu war-barth distowgh,

ma na woer denvyth hy hyns.

13Ytho ni ynwedh, kettell veun genys, a hedhis,

ha nyns esa dhyn tokyn a vertu dhe dhiskwedhes,

mes y feun leun gonsumys yn agan sherewynsi agan honan.’

14Rag govenek an den didhuw yw avel has askall hwythys a-dro gans an gwyns,

ha kepar hag ewyn chasys dhe-ves gans an hager-awel;

hwythys yw kepar ha mog a-rag an gwyns,

hag ev a dremen kepar ha kovadh gwester neb a wodrik saw unn nos.

Gober an Re Wiryon

15Mes an re wiryon a bew bys vykken,

hag yma aga gober gans an Arloedh;

ha'n Ughella a wra aga gwitha.

16Rakhenna i a dhegemmer myghternsys splann,

ha diadem teg dhiworth leuv an Arloedh,

rag gans y leuv dhyghow ev a's kudh,

ha gans y vregh ev a's gwith.

17Ev a gemmer dhodho y dhiwysykter rag y leun-arvwisk,

hag arva pub kreatur rag dial y eskerens;

18ev a wisk ewnder avel lurik,

ha gwirvreus avel basnett.

19Ev a gemmer sansoleth rag skoes antryghadow,

20ha lymma sorr kales rag kledha,

ha'n norvys a jun ganso dhe omladh erbynn y eskar anfur.

21Lughesennow a nij kepar ha sethow medrys yn ta,

ha lamma dhiworth an kommol dhe'n gostenn, kepar dell ve dhiworth gwarak tennys yn ta,

22ha keserennow leun a sorr a vydh tewlys kepar dell ve dhiworth towlbrenn;

dowr an mor a gonner er aga fynn,

hag avonyow a's beudh yn fell;

23gwyns krev a dhrehav er aga fynn,

hag avel hager-awel ev a's hwyth dhe-ves.

Anlaghedh a wra difeythya an bys oll,

ha drog weythresow a dhomhwel tronys pennsevigyon.