Kerensa Solomon dhe Furneth

1My ynwedh yw den marwel, kepar ha peub arall,

hag askorr an kynsa genys a veu formys a dhor;

hag yn torr mamm my a veu furvys avel kig,

2a-ji dhe dermyn deg mis, kowlys yn kig,

dhiworth has gour ha'n plesour a dheu gans kosk.

3Ha pan veuv dineythys, my a dhallathas anella an ayr kemmyn,

ha koedha war an dor kepar ha pub den arall;

ha'n kynsa son a leveris o kri, kepar ha peub arall.

4My a veu megys gans bern yn lystennow.

5Rag nyns eus myghtern vyth re'n jevo dalleth dihaval a dhineythyans;

6nyns eus saw unn fordh a-ji dhe vosva rag peub, hag unn fordh yn-mes.

7Rakhenna my a bysis, ha konvedhes a veu res dhymm;

my a elwis war Dhuw, ha spyrys furneth a dheuth dhymm.

8Gwell o hi genev ages ternwelennow ha tronys,

ha kehevelys gensi rychys o akontys avel mann dhymm;

9ha ny's hevelebis dhe men drudh vyth,

drefenn bos oll owr marnas nebes tewes yn hy golok,

hag arghans a vydh akontys avel pri a-rygdhi.

10My a's karas dres oll yeghes ha tekter,

ha my a's dewisas hy havoes moy es golow dydh,

rag an golow a dheu dhiworti hi nevra ny hedh.

11Hag oll taklow da a dheuth dhymm war-barth gensi,

hag yn hy diwla rychys diniver.

12My a lowenhas ynna oll, drefenn furneth dh'aga hembronk;

mes ny wodhvev hy bos aga mamm.

13My a dhyskas yn onest ha kevrenna yn hel;

ny gudhav hy rychys,

14rag hi yw tresor dhe dus na fyll nevra;

ha'n re a's kyv a gyv kowethyans gans Duw,

kommendys dhodho gans an rohow a dheu dhiworth dyskans.

Solomon a Bys rag Furneth

15Re wrontyo Duw dhymm may kewssiv gans breus,

ha kavoes tybyansow wordhi a'n pyth re dhegemmeris;

drefenn ev dhe vos neb a led dhe furneth

ha kewera an re fur.

16Rag yth eson ni ha'gan geryow yn y leuv,

hag ynwedh oll konvedhes ha sleyghneth yn kreftow.

17Rag ev yw neb a ros dhymm godhvos sur a-dro dhe'n pythow eus,

dhe wodhvos fatell veu an bys gwrys ha gweythres an elvennow;

18dalleth ha diwedh ha kres an termynyow,

troyllyans an howlsavleow ha chanjyow an sesonyow,

19kylghresow an vlydhen ha savleow an ster,

20natur enyvales ha konnar goedhviles,

nerth spyrysyon ha prederow tus,

eghennow plansow ha vertus gwreydhyow;

21ha pup-tra kevrinek po apert my a's goer,

22rag furneth, gweythores pup-tra, a'm dyskas.

Natur Furneth

Rag ynni yma spyrys skentel, sans,

unnik, liesplek, sotel,

gwayadow, kler, andhefolys,

diblans, dibystik, ow kara an pyth yw da, lymm,

23ny yllir sevel er hy fynn, parys yw dhe wul da, kuv dhe vab-den,

fyrv, sur, heb fienasow,

ollnerthek, ow korweles pup-tra,

hag ow tewana dre oll spyrysyon,

kyn fons skentel, pur, ha'n moyha sotel.

24Rag furneth yw moy gwayadow ages oll gwayans;

dre reson hy glander hi a dremen ha dewana pup-tra oll.

25Hi yw anall galloes Duw,

hag omdhyllans pur dhiworth glori an Ollgalloesek;

rakhenna ny yll travyth defolys kavoes fordh a-ji dhedhi.

26Rag hi yw dewynnyans an golewder bythkwethek,

ha gweder-mires dinamm a oberyans Duw,

hag imaj y dhader.

27Kynth yw hi marnas onan, hi a yll gul pup-tra,

hag ow kortos ynni hy honan, hi a nowydhha pup-tra;

yn pub henedh hi a enter dhe enevow sans

ha'ga gul kowetha Duw, ha profoesi;

28rag ny gar Duw nagonan marnas ev usi trigys gans furneth.

29Hi yw tekka ages an howl,

hag a-ugh pub savla a'n ster.

Pan yw kehevelys gans an golow hi yw kevys gwell,

30rag wosa hemma y teu nos,

mes erbynn furneth ny wra drog gwarthevya.