1Hi a omystynn dhiworth unn penn a'n bys dh'y gila yn nerth,

hag ordena pup-tra yn ta.

Kerensa Solomon dhe Furneth

2My a's karas, ha'y hwilas dhiworth ow yowynkneth;

my a vynnas hy gul ow benyn bries,

ha my a goedhas yn kerensa dh'y thekter.

3Hi a dhre enor meur dh'y dineythyans nobyl dre reson hi bos trigys gans Duw,

ha'n Mester a bup-tra oll a's karas.

4Kevrin godhvos Duw re beu dyskys dhedhi,

ha hi a dhewis y oberow.

5Mars yw rychys pyth dhe vos desirys yn bewnans,

pandr'yw moy rych ages furneth, hag a wra dhe bup-tra oll oberi?

6Ha mar pydh konvedhes effeythus,

piw moy agessi yw gweythor a'n pythow eus?

7Ha mar kar nebonan ewnder,

hy lavuryow yw vertus;

rag hi a dhysk omrewl ha doethter,

gwirvreus ha kolonnekter;

nyns eus travyth yn bewnans moy dhe les rag tus ages an re ma.

8Ha mar yeun nebonan war-lergh prevyans ledan,

hi a woer taklow a-henys, ha resna yn ewn an taklow a dheu;

hi a woer sotelneth kows ha displegyans lavarow tewl;

hi a ragwel toknys ha marthusyon

ha siwyans an sesonyow ha'n prysyow.

Furneth yw Anhepkorradow dhe Rewloryon

9Rakhenna my a erviras hy hemmeres dhymm dhe driga genev,

ow kodhvos hi dhe ri dhymm kusul dha

ha kennerth yn prederow hag anken.

10A'y govis hi, my a gyv glori yn mysk an routhow

hag enor yn golok an henavogyon, kynth ov yowynk.

11My a vydh kevys lymm yn breus,

hag yn golok an re alloesek my a vydh enorys.

12Pan dawav i a'm gorta,

ha pan gowsav i a woslow orthiv;

mar kowsav pella,

i a worr aga diwla war aga ganow.

13A'y govis hi my a gyv anvarwoleth,

ha gasa kovadh bythkwethek dhe'n re a dheu war ow lergh.

14My a wovern poblow,

ha kenedhlow a vydh sojet dhymm;

15turans euthyk a berth own pan glewons ahanav;

yn kres an routh my a dhiskwa ow honan abel, ha kolonnek yn bresel.

16Pan entrav y'm chi, my a gyv powesva gensi;

rag nyns eus hwerowder vyth yn keskowethyans gensi,

ha nyns eus payn vyth yn bewnans gensi, mes lowena ha joy.

17Pan dybis vy a-dro dhe'n taklow ma ynnov vi ow honan,

ha'ga ombrederi y'm kolonn

bos anvarwoleth yn keskowethyans gans furneth,

18hag yn kerensa gensi, delit pur,

hag yn lavuryow hy diwla, rychys na fyll nevra,

hag yn prevyans hy howethyans, konvedhes,

hag yn kowethyans gensi, hanow da:

my eth a-dro ow hwilas fatell yllyn vy hy havoes ragov vi ow honan.

19Rag my o flogh gans natur roasek,

hag enev da a goedhas dhe'm rann;

20po moy, drefenn ow bos da, my a dheuth yn korf andhefolys.

21Mes my a gonvedhas na yllis vy dalghenna furneth marnas Duw dh'y ri dhymm

hag y feu poynt a gonvedhes ynwedh dhe wodhvos ro piw o hi,

ytho my a elwis orth an Arloedh ha pysi,

ha gans oll ow holonn my a leveris: