Pysadow Solomon rag Furneth

1‘A Dhuw a'm tasow hag Arloedh a versi,

neb re wrug pup-tra oll gans dha er,

2ha dre dha furneth formya mab-den

rag kavoes mestrynses war an kreaturs re wruss'ta,

3ha rewlya an bys yn sansoleth hag ewnder,

ha ri breus gans enev ewnhynsek:

4ro dhymm an furneth a esedh ryb dha dron,

ha na skon a ri dhymm tyller yn mysk dha wesyon.

5Rag dha was ov vy ha mab dha vaghteth,

den neb yw gwann ha berr y dhydhyow,

gans boghes konvedhes a vreus ha laghow;

6rag kyn fo nebonan perfydh yn mysk mebyon tus

hwath mar nyns usi dha furneth ganso, ev a vydh gwelys avel mann.

7Ty re'm dewisas dhe vos myghtern a'th pobel

ha breusyas war dha vebyon ha myrghes.

8Ty re erghis dhymm drehevel tempel war dha venydh sans,

hag alter y'n sita mayth esos trigys,

hevelep dhe'n tabernakel sans a bareussys dhiworth an dalleth.

9Yma furneth genes, hi neb a woer dha oberow

hag a veu y'th lok pan wruss'ta an norvys;

hi a gonvedh an pyth yw plegadow y'th lok

ha'n pyth yw gwir war-lergh dha worhemmynnow.

10Dannvon hi yn-rag dhiworth an nevow sans,

ha dhiworth tron dha wolewder dannvon hi,

may hyll hi lavurya genev,

may hylliv godhvos an pyth yw plegadow dhis.

11Rag hi a woer ha konvedhes pup-tra oll,

ha hi a wra ow gidya gans doethter y'm gweythresow

ha'm gwitha yn hy golewder.

12Ena ow oberow a vydh kemmeradow,

ha my a vreus dha bobel yn ewn,

ha my a vydh wordhi dhe gavoes tron ow thas.

13Rag py den eus a yll godhvos kusul Duw?

Po piw a yll dissernya pyth yw bodh an Arloedh?

14Rag tybyansow tus varwel yw ownek,

ha'gan towlow yw deantell;

15rag korf podradow a boes war an enev,

ha'n tabernakel a bri a boes war an brys prederus.

16Ny yllyn skant dysmygi a-dro dhe'n taklow usi war an norvys,

ha gans lavur ni a gyv an taklow usi a-dheragon;

mes an taklow usi yn nev piw re's helerghis?

17Piw re wodhva dha gusul,

marnas ty a re furneth

ha dannvon dha spyrys sans a-wartha?

18Yndella hynsyow an re usi trigys war an norvys a veu settys ewn,

hag y feu dyskys dhe dus an taklow yw plegadow dhis,

hag i a veu selwys dre furneth.’