An re Wiryon a Gyv Furneth

1Kerewgh ewnder, hwi vreusysi a'n norvys,

prederewgh a'n Arloedh gans kolonn dha,

hag yn sempledh a golonn hwilewgh ev.

2Rag ev a vydh kevys gans an re na'n prev,

hag yth omdhiskwedh dhe'n re na berth dout anodho.

3Rag prederow kamm a dhiberth dhiworth Duw,

ha'y alloes, pan vydh prevys, a geredh an re foll.

4Rag ny enter furneth yn fals enev,

na triga yn korf yw gostydh dhe begh.

5Rag spyrys sans ha dyskys a fi falsuri,

ha diberth dhiworth tybyansow foll,

ha perthi meth pan nes kammhynseth.

6Furneth yw spyrys kuv dhe vab-den,

mes ny liver den blasfemus dhiworth geryow y dhiwweus;

drefenn bos Duw dustunier aga lonethi,

ha gwir aspier a'ga holonn, ha goslowyas aga thaves.

7Rag spyrys an Arloedh re lenwis an norvys,

ha'n spyrys a syns pup-tra war-barth hag a aswonn pub lev.

8Rakhenna ny yll denvyth kewsel taklow anwiryon ha bos kudhys,

na ny wra ewnder, pan gessydh, tremena dresto.

9Hwithrans a vydh gwrys a-dro dhe gusul an den didhuw,

ha derivas y eryow a dheu dhe'n Arloedh

dh'y geredhi a'y gammweythresow.

10Rag skovarn avius a glew pup-tra,

ha son krodhvolow ny vydh kudhys.

11Bedhewgh war a grodhvol euver,

ha gwithewgh agas taves dhiworth sklander;

rag ny vydh ger kevrinek heb siwyans,

ha ganow a wowlever a ladh an enev.

12Na hwilewgh ankow dre gammwrians agas bewnans,

ha na drewgh warnowgh distruyans der oberow agas diwla.

13Rag ny wrug Duw ankow,

ha ny gemmer plesour yn mernans an re vew.

14Rag ev a wrug pup-tra may kaffens aga bosva;

hag ev a vynnas pub eghenn kreatur a'n norvys dhe vos yaghus,

heb venim a dhistruyans ynna,

ha nyns eus dhe ifarn mestrynses war an norvys.

15Rag ewnder yw anvarwel.

16Mes an re dhidhuw der aga geryow hag oberow a elwis ankow dhedha;

ow synsi y vos koweth, i a omwethas

ha gul kevambos ganso,

drefenn aga bos wordhi dhe vos rann a'y berghennogeth.