Galow dhe Edrega

1Y'n ethves mis an nessa blydhen Darius, ger an Arloedh a dheuth dhe'n profoes Zekaria mab Berekia, mab Iddo, ow leverel: 2An Arloedh o serrys fest orth agas tasow. 3Rakhenna lavar dhedha, Yndellma y lever an Arloedh: Dehwelewgh dhymmo vy, yn-medh Arloedh an luyow, ha my a dhehwel dhywgh, yn-medh Arloedh an luyow. 4Na vedhewgh haval dh'agas tasow, a grias an brofoesi dhedha a-henys, ow leverel, ‘Yndellma y lever an Arloedh: Treylyewgh a'gas tebel fordhow ha'gas tebel oberow.’ Mes ny woslowsons na'm attendya, yn-medh an Arloedh. 5Agas tasow, ple'mons i? Ha'n brofoesi, a vewons bys vykken? 6Yn hwir, ow geryow ha'm ordenansow, a erghis dhe'm gwesyon an brofoesi, a ny dhrehedhsons dh'agas tasow? Ena i a gavas edrek ha leverel, ‘Par dell vynnas Arloedh an luyow gul dhyn rag agan fordhow ha'gan oberow, yndella y hwrug ev dhyn.’

Gwelesigeth an Vergh

7Y'n peswora dydh warn ugens a'n unnegves mis, yw mis Shebat, y'n nessa blydhen a Darius, ger an Arloedh a dheuth dhe'n profoes Zekaria mab Berekia, mab Ido, ow leverel, 8Y'n nos my a viras, hag otta gour ow marghogeth war vargh rudh, ow sevel yn mysk an myrtwydh yn kownans, hag a-dryv dhodho mergh rudh, gorm ha gwynn. 9My a leveris, ‘Pyth yw an re ma, ow arloedh?’ An el esa ow kewsel orthiv a leveris, ‘My a dhiskwa dhis pyth yns i.’ 10Ena an gour esa ow sevel yn mysk an myrtwydh a worthybis, ‘I yw an re a wrug an Arloedh aga dannvon dhe wandra der an norvys.’ 11Hag i a worthybis dhe el a'n Arloedh esa ow sevel yn mysk an myrtwydh ha leverel, ‘Ni re wandras der an norvys, hag awotta, oll an norvys a esedh yn kosoleth.’ 12Hag el a'n Arloedh a worthybis, ‘Arloedh an luyow, pes termyn ny gemmerydh truedh a Yerusalem hag a sitys Yuda, may serrsys orta an deg blydhen ha tri-ugens ma?’ 13An Arloedh a worthybis an el a gewsis orthiv gans geryow a guvder ha konfort. 14Ena an el esa ow kewsel orthiv a leveris dhymm, Kri, ow leverel: Yndellma y lever Arloedh an luyow: Avi bras a'm beus a-barth Yerusalem ha Sion, 15mes sorr bras a'm beus orth an kenedhlow yw attes. My a sorras nebes orta, mes i a weresas an galar. 16Ytho yndellma y lever an Arloedh: My a wra dehweles dhe Yerusalem gans truedh, hag ena ow chi a vydh dastrehevys, yn-medh Arloedh an luyow, ha'n gordenn-vusura a vydh ystynnys dres Yerusalem. 17Kri arta ow leverel, Yndellma y lever Arloedh an luyow: Ow sitys a wra fenna arta gans dader, ha'n Arloedh a wra konfortya Sion arta, hag arta ev a dhewis Yerusalem.

Gwelesigeth an Kern

18Ena my a dhrehevis ow dewlagas ha mires, hag awotta peswar korn.1:18 1:18-21 yw niverys 2:1-4 y'n tekst ebrow ha'n Septuagint. 19My a leveris dhe'n el esa ow kewsel orthiv, ‘Pyth yw an re ma?’ Ev a worthybis dhymm, ‘I yw an kern a skattras Yuda, Ysrael, ha Yerusalem.’ 20Ena an Arloedh a dhiskwedhas dhymm peswar gov. 21My a leveris, ‘Dhe wul pandra y teuth an re ma?’ Ev a worthybis, ‘An re ma yw an kern a skattras Yuda ma na dhrehevis nagonan y benn, mes an wovyon ma deuva dh'aga ownekhe ha dhe dewlel yn-nans kern an kenedhlow a dhrehevis aga hern erbynn pow Yuda dh'y skattra.’