Restorita Yuda hag Ysrael

1Govynnewgh glaw orth an Arloedh

yn termyn an glaw diwedhes.

An Arloedh a wra kommol tewedh;

ev a re kowasow glaw dhedha,

ha dhe bubonan ev a re gwels y'n gwel.

2An imajys re gewsis flows,

ha'n goelyogyon re welas gwelesigethow gowek;

i a dheriv fals hunrosow,

i a re konfort euver.

Ytho an dus a wander avel deves,

yn ahwer, rag nyns eus bugel.

3Ow sorr a lesk erbynn an vugeledh,

my a wra kessydhya an ledyoryon;10:3 ledyoryon: Ebrow boghes.

rag an Arloedh a with y flokk, chi Yuda,

hag ev a's gwra avel y vargh splann yn batel.

4Dhiworto y teu an pennmen,

dhiworto an ebil,

dhiworto gwarak an gas,

dhiworto y teu pub rewler.10:4 rewler: Po turant.

5I a vydh avel kasoryon alloesek

ow stankya yn leys an stretow yn batel.

I a omladh, drefenn bos an Arloedh gansa,

hag i a wra bismer dhe varghogyon an vergh.

6My a wra nertha chi Yuda

ha selwel chi Yosep.

My a wra aga restorya, rag my a gemmer truedh anedha.

I a vydh kepar ha pan na wrugavy aga skonya;

rag yth ov vy an Arloedh aga Duw, ha my a wra aga gorthybi.

7Efraym a vydh avel kasor galloesek,

ha'ga holonn a vydh heudh avel gans gwin.

Aga fleghes a'n gwel hag a vydh heudh;

aga holonn a vydh lowen y'n Arloedh.

8My a wra aga huntelles gans hwiban,

rag my re wrug aga dasprena.

I a vydh niverus kepar dell vons kyns.

9Kyn y's skattrav avel has yn mysk an poblow,

hwath yn gwlasow pell i a berth kov ahanav.

I ha'ga fleghes a vew, hag i a dhehwel.

10My a wra aga hembronk dhe-dre yn-mes a bow Ejyp

ha'ga huntelles yn-mes a Assyria.

My a wra aga dri dhe bow Gilead ha dhe Lebanon,

ha ny vydh spas lowr ragdha.

11I a wra tremena dre vor a ankres,

ha gweskel an tonnow y'n mor

hag oll downderyow an avon a vydh sygh.

Goeth Assyria a vydh uvelhes,

ha gwelenn Ejyp a dremen dhe-ves.

12My a wra aga nertha y'n Arloedh,

hag yn y hanow ev i a gerdh a-dro,

yn-medh an Arloedh.