Glanheans a Beghadow

1Y'n jydh na y fydh fenten igerys dhe ji Davydh ha dhe drigoryon Yerusalem rag pegh ha mostedhes. 2Y'n jydh na, yn-medh Arloedh an luyow, my a wra dilea henwyn an imajys dhiworth an tir, ha ny vydhons kovhes byth moy; ynwedh my a wra gorra dhe-ves a'n tir an brofoesi ha'n spyrys avlan. 3Mar kwra nebonan profoesa hwath, ena y das ha'y vamm a'n dineythis a lever dhodho, ‘Ny vewydh; rag ty re wowleveris yn hanow an Arloedh.’ Y das ha'y vamm a'n dineythis a wra y wana pan wra ev profoesa.

4Y'n jydh na, pub profoes a vydh methek a'y welesigeth, pan wra ev profoesa. Ny wisk mantell blew rag may toello. 5Ev a lever, ‘Nyns ov vy profoes, tiek ov vy; rag den a'm prenas13:5 den a'm prena: Styr an Ebrow yw ankler. Martesen my re bewva tir. dhiworth ow yowynkneth.’ 6Nebonan a lever dhodho, ‘Pyth yw an goliow ma yntra dha dhiwla?’13:6 yntra dha dhiwla: Martesen an styr yw war dha geyn, po war dha gloes-diwvronn. Henn yw sin a honan-skorjya, dell o gwrys yn gordhyans pagan. Ena ev a lever, ‘An goliow a gemmeris yn chi ow howetha.’

An Bugel Gweskys, ha'n Flokk Skattrys

7‘Difun, A gledha, erbynn ow bugel,

erbynn an den yw ow howeth!’

yn-medh Arloedh an luyow.

Gwask an bugel,

ha'n deves a vydh skattrys,

ha my a dreyl ow leuv erbynn an re vyghan.

8Yn oll an tir, yn-medh an Arloedh,

diw rann a vydh treghys dhe-ves hag y ferwons;

mes an tressa a vydh gesys ynno.

9My a dhre an tressa rann dre'n tan,

ha'ga furhe dell yw purhes an arghans,

a'ga frevi dell yw prevys an owr.

Ev a wra gelwel war ow hanow,

ha my a worthyp dhodho;

my a lever, ‘Ev yw ow fobel’,

hag ev a lever, ‘An Arloedh yw ow Duw.’