An Omladh rag Yerusalem

1Awotta, dydh a dheu rag an Arloedh, may fo rynnys dha breydh a-berth ynnos.

2My a wra kuntell oll an kenedhlow erbynn Yerusalem rag kas; ha'n sita a vydh kemmerys, ha'n chiow pyllys, ha'n benynes defolys. Hanter an sita a dheu yn divroedh, mes an remenant ny vydh treghys dhe-ves dhiworth an sita.

3Ena an Arloedh a dheu yn-mes, ha batalyas orth an kenedhlow na kepar dell wra batalyas yn dydh an gas. 4Ha'y dreys a wra sevel, y'n jydh na, war an menydh Oliv, usi a-rag Yerusalem dhe'n howldrevel, ha'n menydh Oliv a vydh folsys yn dew hanter a'n howldrevel dhe'n howlsedhes, nans fest bras; ha hanter an menydh a vydh removyes dhe'n kledh, ha hanter dhe'n dyghow. 5Hwi a wra fia dre nans ow menydhyow; rag nans an menydhyow a dhrehedh bys Asal. Hwi a wra fia dhe'n fo kepar dell fisowgh a-rag an dorgrys yn dydhyow Uzzia myghtern Yuda. Ena an Arloedh ow Duw a dheu, hag oll an syns genes.14:5 genes: War-lergh an Septuagint ganso.

6Y'n jydh na ny vydh golow, na yeynder na rew.14:6 Amendys war-lergh an Septuagint. Ebrow ny vydh golow a daklow drudh. 7Y fydh unn jydh, aswonnys dhe'n Arloedh, heb naneyl dydhweyth na nosweyth, mes y fydh golow y'n gorthugher.

8Y'n jydh na dowr bew a wra mos yn-mes dhiworth Yerusalem, hanter anodho dhe mor an howldrevel ha hanter anodho dhe mor an howlsedhes: y hwyrvydh yn hav hag yn gwav.

9An Arloedh a vydh myghtern a-ugh oll an norvys. Y'n jydh na y fydh unn Arloedh, hag y hanow a vydh onan.

10Oll an tir a dheu ha bos avel Araba14:10 avel Araba: Po avel plen sygh. dhiworth Geba dhe Rimmon, a'n dyghow dhe Yerusalem. Mes hi a vydh drehevys hag annedhys yn hy le, dhiworth Yet Benyamin dhe dyller an kynsa yet, dhe Yet an Gornell, ha dhiworth Tour Hananel dhe winwaskow an myghtern. 11Tus a wra triga ynni; ny vydh nevra arta sakrys dhe dhistruyans, mes Yerusalem a wra triga yn sawder.

12Hemma a vydh an plag a wra an Arloedh y dhannvon dhe weskel oll an poblow re vatalyas orth Yerusalem; aga hig a beder hag i ow sevel war aga threys aga dewlagas a beder yn aga krawyow; ha'ga thaves a beder yn aga ganow. 13Y'n jydh na y fydh meur dheray dhiworth an Arloedh yn aga mysk. An eyl a dhalghenn leuv y gila, ha den a dhrehav y leuv erbynn y gentrevek. 14Ynwedh Yuda a wra omladh yn Yerusalem. Rychys oll an kenedhlow y'n kyrghynn a vydh kuntellys, owr, arghans, ha dillas, myns meur. 15Ytho y fydh plag haval dhe'n plag ma war an vergh, an mulyon, an kowrvergh, an asenes, hag oll an bestes y'n tyldow na.

16Pubonan a vo gesys dhiworth oll an kenedhlow neb a dheuth erbynn Yerusalem a wra mos yn-bann a vlydhen dhe vlydhen dhe wordhya an Myghtern, Arloedh an luyow, ha dhe solempnya goel an skovvaow. 17An re na wrons mos yn-bann dhiworth teyluyow an norvys dhe Yerusalem dhe wordhya an Myghtern, Arloedh an luyow, ny's tevydh glaw warnedha. 18Mar ny wra teylu Ejyp mos yn-bann, na dos, warnedha y fydh an plag a wra an Arloedh y dhannvon war an kenedhlow na wrons mos yn-bann dhe solempnya goel an skovvaow. 19Hemma a vydh kessydhyans pegh Ejyp, ha kessydhyans oll an kenedhlow na wrons mos yn-bann dhe solempnya goel an skovvaow.

20Y'n jydh na ‘Sansoleth dhe'n Arloedh’ a vydh war klegh an vergh, ha'n pottow yn chi an Arloedh a vydh avel an bollow a-rag an alter. 21Pub pott yn Yerusalem hag yn Yuda a vydh ‘Sansoleth dhe Arloedh an luyow’, ha pubonan a dheu dhe sakrifia a gemmer nebes anedha, ha bryjyon ynna; ha ny vydh Kananek14:21 Kananek: Po marchont. namoy y'n chi Arloedh an luyow.