Gwelesigeth a'n Gour gans Kordenn-vusura

1My a dhrehevis ow dewlagas arta ha mires, hag awotta gour gans kordenn-vusura yn y leuv.2:1 2:1-13 yw niverys 2: 5-17 y'n tekst ebrow ha'n Septuagint. 2My a leveris, ‘Ple'th edh?’ Ev a worthybis, ‘Dhe vusura Yerusalem, dhe weles pyth yw hy les ha'y hys.’ 3Hag awotta, an el esa ow kewsel orthiv eth yn-rag, hag el arall eth yn-mes dh'y dhyerbynna 4ha leverel dhodho, ‘Poenya gwra, deriv orth an yonker na: Yerusalem a vydh sita heb fosow drefenn an myns meur a dus ha bestes a-ji dhedhi. 5My a vydh fos tan a-dro, yn-medh an Arloedh, ha my a vydh golewder a-bervedh ynni.’

An Bobel Gelwys tre dhiworth Kethneth

6Yn-sol! Yn-sol! Fiewgh a dir an kledh, yn-medh an Arloedh, rag my re'gas lesas avel an peswar gwyns a nev, yn-medh an Arloedh. 7Yn-sol, A Sion! Diank, ty neb eus trigys gans Myrgh Babylon! 8Rag yndellma y leveris Arloedh an luyow, wosa y wolewder dhe'm dannvon dhe'n kenedhlow a wrug agas pylla; rag piwpynag a wrello agas tochya a doch bew y lagas. 9Sur my a wra drehevel ow leuv er aga fynn hag i a vydh preydh dh'aga servysi. Ena hwi a woer y hwrug Arloedh an luyow ow dannvon. 10Kan ha lowenha, A Vyrgh Sion, rag awotta, yth esov vy ow tos, ha my a wra triga y'th fysk, yn-medh an Arloedh. 11Lies kenedhel a vydh junys dhe'n Arloedh y'n jydh na hag i a vydh ow fobel. My a wra triga y'th fysk ha hwi a woer y hwrug Arloedh an luyow ow dannvon dhis. 12An Arloedh a wra erita Yuda avel y rann y'n tir sans hag ev a dhewis Yerusalem arta.

13Taw a-rag an Arloedh, oll kig, rag difunys yw a-dhiworth y drigva sans.