Gwelesigeth Yoshua an Arghoferyas

1Ena ev a dhiskwedhas dhymm Yoshua an arghoferyas ow sevel a-rag el an Arloedh, ha Satnas ow sevel a-dhyghow dhodho dh'y guhudha. 2An Arloedh a leveris dhe Satnas, ‘An Arloedh re'th kerettho, Satnas! An Arloedh, usi ow tewis Yerusalem, re'th kerettho! A nyns yw hemma yttew tennys mes a'n tan?’ 3Lemmyn, Yoshua a veu gwiskys yn dillas plos pan esa ow sevel a-rag an el. 4An el a leveris dhe'n re esa ow sevel a-ragdho, ‘Kemmerewgh dhiworto an dillas plos.’ Ena ev a leveris dhe Yoshua, ‘Mir, my re dhug dhiworthis dha gammhynseth, ha my a wra dha wiska yn dillas teg.’ 5Ena my a leveris, ‘Gorrens tulyfant glan war y benn.’ Ytho i a worras tulyfant glan war y benn ha'y wiska, hag el an Arloedh esa ow sevel yn ogas.

6El an Arloedh a ros an charj ma dhe Yoshua: 7‘Yndellma y lever Arloedh an luyow: Mar kerdhydh y'm fordhow ha gwitha ow charj, ena ty a wra governa ow chi ha gwitha ow klosyow, ha my a re dhis awtorita dhe dhos ha mos yn mysk an re usi ow sevel omma. 8Goslow, a Yoshua an arghoferyas, ty ha'th keskowetha owth esedha a-ragos, rag tokyn yns i, my dhe dhri ow gwas, an Skorrenn. 9Awotta'n men a worris a-rag Yoshua! Yma seyth lagas war unn men, ha my a wra gravya skrifa warnodho, yn-medh Arloedh an luyow, ha my a wra remova pegh an tir ma yn unn jydh. 10Y'n jydh na, yn-medh Arloedh an luyow, pubonan a wra gelwel y gentrevek dhe esedha yn-dann y winbrenn ha'y figbrenn.’