Gwelesigeth an Kantolbrenn

1Ena an el esa ow kewsel orthiv a dhehwelis hag a wrug dhymm difuna, avel den yw difunys dhiworth y gosk. 2Ev a leveris dhymm, ‘Pandr'a welydh?’ My a worthybis, ‘My a viras, hag otta kantoler gwrys oll yn tien a owr, ha bolla war y benn ha seyth lugarn warnodho, ha seyth pibenn dhe'n lugern usi war y benn. 3Ynwedh y feu dew olewbrenn rybdho, onan a-dhyghow dhe'n bolla hag onan a-gledh dhodho.’ 4My a wovynnas orth an el esa ow kewsel orthiv, ‘Pandra yw an taklow ma, o arloedh?’ 5An el esa ow kewsel orthiv a worthybis, ‘A ny wodhes pyth yns i?’ My a leveris, ‘Na wonn, ow arloedh.’ 6Ena ev a leveris dhymm, ‘Hemm yw ger an Arloedh dhe Zerubbabel: Ny vydh gans galloes na gans nerth, mes gans ow Spyrys, yn-medh Arloedh an luyow. 7Piw osta, A venydh krev? A-rag Zerubbabel y fydhydh gwastattir. Ena ev a wra dri yn-mes an pennmen, hag i ow karma, “Ras! Ras dhodho!” ’

8Ha ger an Arloedh a dheuth dhymm, ow leverel: 9‘Diwla Zerubbabel a fondyas an chi ma; y dhiwla a wra y worfenna. Ena ty a woer y hwrug Arloedh an luyow ow dannvon dhis. 10Piw a fi an jydh a bythow byghan? I a wra lowenhe pan welons an plemmik yn leuv Zerubbabel.

‘An seyth ma yw lagasow an Arloedh a wander hys-ha-hys a-dro dhe'n nor.’ 11Ena my a wovynnas orto, ‘Pandr'yw an dhew olewbrenn ma a-dhyghow dhe'n kantoler hag a-gledh dhodho?’ 12Arta my a wovynnas orto, ‘Pandr'yw an dhiw skorrenn oliv ryb an dhiw bibenn owr a dhiver olew owrek?’ 13Ev a worthybis, ‘A ny wodhes pyth yns i?’ My a leveris, ‘Na wonn, ow arloedh.’ 14Ev a leveris dhymm, ‘An re ma yw an dhew untys a sev ryb Arloedh oll an norvys.’