Gwelesigeth an Rol-skrifa

1Arta my a dhrehevis ow dewlagas ha mires, hag awotta rol-skrifa esa ow nija. 2Ev a leveris dhymm, ‘Pandr'a welydh?’ My a worthybis, ‘My a wel rol-skrifa ow nija, ugens kevelin hy hys ha deg kevelin hy les.’ 3Ena ev a leveris dhymm, ‘Homm yw an volleth usi ow mos yn-mes war enep oll an tir; rag herwydh an skrif war unn tenewen, pub lader a vydh pellhes, ha herwydh skrif an tenewen arall pubonan a wowli a vydh pellhes. 4My a wra hy dannvon yn-mes, yn-medh Arloedh an luyow, ha hi a enter chi an lader ha chi an den a wowli re'm hanow. Hi a drig yn kres y ji ha'y dhistrui, gans y blenkynnow ha'y veyn.’

Gwelesigeth an Efa

5Ena an el esa ow kewsel orthiv eth yn-mes ha leverel dhymm, ‘Drehav dha dhewlagas ha gwel an pyth usi ow tos yn-mes.’ 6My a wovynnas, ‘Pandra yw?’ Ev a worthybis, ‘Efa5:6 Efa: Henn yw kanstell a-dro dhe unn bushel y vraster. yw, ow mos yn-mes.’ Hag yn-medh ev, ‘Hemm yw aga feghes dre oll an tir.’ 7Hag awotta, an gorher plomm a veu drehevys a-dhiwarnodho, hag yth esa benyn owth esedha y'n efa. 8Ev a leveris, ‘Homm yw droktra’, hag ev a's herdhyas yn-nans a-ji dhe'n efa ha tewlel an gorher plomm war y anow. 9Ena my a dhrehevis ow dewlagas ha mires, hag awotta diw venyn esa ow mos yn-mes, gans gwyns yn aga eskelli; rag y feu dhedha eskelli avel eskelli hwibon, hag i a dhrehevis an efa yntra nor ha nev. 10My a wovynnas an el esa ow kewsel orthiv, ‘Ple'mons i ow tri an efa?’ 11Ev a worthybis, ‘Dhe dhrehevel chi rygdhi yn pow Shinar. Pan yw parys, hi a vydh gorrys ena yn hy le.’