Gwelesigeth an Peswar Charett

1Arta my a dhrehevis ow dewlagas ha mires, hag awotta peswar charett a dheuth yn-mes dhiworth an bolgh yntra dew menydh, ha'n menydhyow a veu menydhyow a vrons! 2An kynsa charett a'n jeva mergh rudh, an nessa a'n jeva mergh du, 3an tressa charett a'n jeva mergh gwynn, ha'n peswora a'n jeva mergh brithek; nerthek vons. 4My a wovynnas an el esa ow kewsel orthiv, ‘Pandra yns i, ow arloedh?’ 5An el a worthybis dhymm, ‘An re ma yw an peswar gwyns a nev esa ow mos yn-mes dhiworth aga savla a-rag Arloedh oll an norvys. 6Yma an charett gans mergh du ow mos yn-mes dhe'n tir kledh, an vergh gwynn eth yn-mes war aga lergh, ha'n vergh brithek eth yn-mes dhe dir an dyghow.’ 7Pan eth an vergh nerthek yn-mes, i a vynnas gwandra der an norvys. Hag ev a leveris, ‘Kewgh dhe wandra der an norvys!’ Ytho i a wandras der an norvys.

Kurunans an Arghoferyas Yoshua

8Ena ev a'm gelwis ha kewsel orthiv, ‘Mir, an re na esa ow mos yn-mes dhe'n tir kledh re ros powes dhe'm spyrys yn tir kledh.’ 9Ger an Arloedh a dheuth dhymm, ow leverel: 10Kemmer dhiworth an dhivresow, dhiworth Helday, Tobia, ha Yedaya; ha ty ke y'n keth jydh na dhe ji Yosia mab Sefania. 11Kemmer arghans hag owr ha gwra kurun, ha'y gorra war benn Yoshua mab Yehosadak, an arghoferyas. 12Lavar dhodho, Yndellma y lever Arloedh an luyow: Awotta'n gour, Skorrenn6:12 Skorrenn: Po Egin. y hanow, hag ev a dyv6:12 dyv: Po egina a wra. a-dhiworth y le ha drehevel tempel an Arloedh. 13Ev a wra drehevel tempel an Arloedh, hag ev a dheg an meuredh hag esedha ha governa war y se. Ev a vydh oferyas war y se, hag y fydh kusul kres ynter an dhew. 14An gurun a vydh avel kovadh dhe Helem, dhe Tobia, dhe Yedaya ha dhe Hen6:14Hen: Po war-lergh an Syriek Yosia. mab Sefania yn tempel an Arloedh. 15An re neb yw pell a dheu hag i a dhrehav tempel an Arloedh, ha hwi a woer Arloedh an luyow ow dannvon dhywgh. Homma a hwyrvydh mar koslewowgh yn tiwysyk orth an Arloedh agas Duw.