Govynn a-dro dhe Benys

1Y'n peswora blydhen a Darius an myghtern, ger an Arloedh a dheuth dhe Zekaria y'n peswora jydh a'n nawves mis, Kislev. 2An dus a Bethel re dhannvonsa Shareser ha Regem-melek, gans aga thus, dhe bysi war an Arloedh,7:2 dhe bysi war an ARLOEDH: Ebrow dhe dhiserri fas an ARLOEDH. 3ow leverel dhe'n oferysi yn chi Arloedh an luyow ha dhe'n brofoesi, ‘A dalav galari ha gul penys y'n pympes mis, dell wren vy nans yw lies blydhen?’ 4Ger Arloedh an luyow a dheuth dhymm, ow leverel, 5Govynn oll pobel an tir ha'n oferysi: Pan wrussowgh penys ha galari y'n pympes ha seythves mis dres an deg blydhen ha tri-ugens eus passys, a veu ragov vy y hwrussowgh penys? 6Pan dhebrowgh hag eva, a ny dhebrowgh hag eva ragowgh hwi agas honan?

Kessydhyans rag Disobaya Gorhemmynnow Duw

7A nyns yw an re ma an geryow a armas an Arloedh dre'n profoesi a-henys, pan veu Yerusalem annedhys ha kosel, ha'n trevow yn hy hyrghynn ha'n Negeb ha'n Shefela annedhys ynwedh? 8Ger an Arloedh a dheuth dhe Zekaria, ow leverel, 9Yndellma y lever Arloedh an luyow: Breusewgh gans gwirvreus; gwrewgh mersi ha piteth an eyl dh'y gila. 10Na arweskewgh gwedhwes nag omdhivas, alyon na boghosek. Na dybewgh drog yn agas kolonn, den erbynn y vroder. 11Mes i a skonyas a woslowes; i a dreylyas aga skoedh yn hworth ha stoppya aga skovornow a glewes. 12I a wrug aga holonn avel adamant rag na glewvens an lagha, na'n geryow a wrug Arloedh an luyow aga dannvon gans y Spyrys dre'n profoesi a-henys. Ytho sorr bras a dheuth dhiworth Arloedh an luyow. 13Pan elwis ev, ny woslowsons i. Ytho pan alwsons, ny woslewis vy, yn-medh Arloedh an luyow. 14My a wrug aga skattra gans korwyns yn mysk oll an kenedhlow na's aswonnsons. An tir a veu ynyal war aga lergh, ma na wrug denvyth tremena dredho na dehweles. Y hwrussons an tir hweg dhe vos ynyal.