Ambos Dastrehevyans Yerusalem

1Ger Arloedh an luyow a dheuth, ow leverel, 2Yndellma y lever Arloedh an luyow: My yw pur avius rag Sion; avius ov rygdhi gans gwres meur. 3Yndellma y lever An Arloedh: My re dhehwelis dhe Sion ha my a vydh trigys yn mysk Yerusalem. Ena Yerusalem a vydh henwys ‘Sita an gwir’, ha menydh Arloedh an luyow ‘An menydh sans.’ 4Yndellma y lever Arloedh an luyow: Arta gwer goth ha benynes koth a wra esedha yn stretys Yerusalem, kettep onan gans lorgh yn y leuv drefenn niver bras y dhydhyow. 5Stretys an sita a vydh leun a vebyon ha myrghes ow kwari yn hy stretys. 6Yndellma y lever Arloedh an luyow: Mars yw marthys yn dewlagas remenant an bobel y'n dydhyow ma, a vydh marthys ynwedh y'm dewlagas vy? yn-medh Arloedh an luyow. 7Yndellma y lever Arloedh an luyow: My a wra sawya ow fobel a-dhiworth bro an howldrevel ha bro an howlsedhes. 8My a wra aga dri, hag i a drig a-bervedh yn Yerusalem; i a vydh ow fobel, ha my a vydh aga Duw yn gwirder hag ewnder.

9Yndellma y lever Arloedh an luyow: Bedhes krev agas diwleuv, hwi neb a glew y'n dydhyow ma an geryow na dre anow an brofoesi y'n termyn may feu grondys chi Arloedh an luyow, rag may fo drehevys an tempel. 10Rag kyns an dydhyow na ny veu arveth rag den, ha ny veu arveth rag best. Ny veu kres rag an den ow mos yn-mes hag ow tos a-ji, drefenn an eskar, rag my a settyas pub den oll an eyl erbynn y gentrevek. 11Ha lemmyn, ny vydhav kepar dell veuv y'n dydhyow kyns dhe remenant an bobel ma, yn-medh Arloedh an luyow. 12An has a wra tevi yn kres, an gwinbrenn a re y frut, an tir a re y drevas, ha'n nevow a re aga gluth. My a re oll an taklow ma avel eretons rag remenant an bobel ma. 13Ha kepar dell vewgh molleth yn mysk an kenedhlow, A ji Yuda ha ji Ysrael, yn kettella my a wra agas sawya, ha hwi a vydh bennath. Na berthewgh dout, mes krevhewgh agas diwleuv.

14Yndellma y lever Arloedh an luyow: Par dell erviris dri drog warnowgh hwi pan wrug agas tasow ow serri, ha ny'm beu piteth, yn-medh Arloedh an luyow, 15yn kettella my a erviras gul mas arta y'n dydhyow ma dhe Yerusalem ha dhe ji Yuda. Na berthewgh dout. 16Hwi a wra an taklow ma: kewsewgh an gwir an eyl orth y gila; rewgh breus a wirder ha kres yn agas porthow; 17na brederewgh drog yn agas kolonn erbynn agas kentrevek, ha na gerewgh gowlia. My a gas oll an re na, yn-medh an Arloedh.

18Ger Arloedh an luyow a dheuth dhymm, ow leverel, 19Yndellma y lever Arloedh an luyow: Penys an peswora mis, ha penys an seythves, ha penys an degves a vydh lowender ha heudhder ha kuntellesow hweg dhe ji Yuda. Ytho kerewgh gwiryonedh ha kres.

20Yndellma y lever Arloedh an luyow: Hwath poblow a dheu, ha trigoryon lies sita; 21ha trigoryon unn sita a wra mos dhe'n arall ow leverel, ‘Deun ni devri dhe bysi war an Arloedh8:21 dhe bysi war an ARLOEDH: Ebrow dhe dhiserri fas an ARLOEDH. ha dhe hwilas Arloedh an luyow. My ow honan a wra mos ynwedh.’ 22Ha meur a boblow ha kenedhlow krev a dheu dhe hwilas Arloedh an luyow yn Yerusalem ha dhe bysi war an Arloedh.8:22 Ebrow dhe dhiserri fas an ARLOEDH. 23Yndellma y lever Arloedh an luyow: Y'n dydhyow na deg gour dhiworth oll yethow an kenedhlow a dhalghenn lostenn an goen a wour yedhowek, ow leverel, ‘Deun ni genowgh hwi, rag ni re glewas bos Duw genowgh.’