1Ger an Arloedh a dheuth dhe Sefania, mab Kushi, mab Gedalia, mab Amaria, mab Hezekia, yn dydhyow Yosia1:1 Yosia: 640-609 kyns Krist. mab Amon, myghtern Yuda:

Breus war Yuda ow Tos

2Skuba dhe-ves a wrav pup-tra oll

dhiworth enep an tir, yn-medh an Arloedh.

3My a skub dhe-ves den ha best;

my a skub dhe-ves ydhyn an nev

ha puskes an mor,

ha domhwel an debeles;

ha my a dregh mab-den a-dhiwar enep an tir,

yn-medh an Arloedh.

4My a ystynn ow leuv erbynn Yuda

hag erbynn an drigoryon oll a Yerusalem;

ha my a dregh remenant Baal dhiworth an tyller ma

ha hanow an Kemarim1:4 Kemarim: Oferysi an idolys. gans an oferysi;

5ha'n re a ombleg war an tohow

dhe lu an nevow;

ha'n re a ombleg war an tohow ha ti re'n Arloedh

ha ti ynwedh re Milkom;

6ha'n re a dreyl dhiworth an Arloedh;

ha'n re na hwilas an Arloedh ha na wovynnas kusul dhiworto.

7Taw yn lok an Arloedh Duw:

rag ogas yw dydh an Arloedh.

Rag an Arloedh re bareusis sakrifis,

ev re sanshas y westoryon.

8Hag y hwyrvydh yn dydh sakrifis an Arloedh,

my dhe gessydhya an bennternedh, ha mebyon an myghtern,

hag oll an re yw gwiskys yn dillas estren.

9Y'n jydh na my a gessydh

oll an re a lamm dres an treudhow,1:9 an re a lamm dres an treudhow: Gwel 1Sa 5:5.

neb a lenow chiow aga arloedh

gans garowder ha gil.

10Hag y'n jydh na, yn-medh an Arloedh,

y fydh son a gri dhiworth Yet an Puskes,

hag oulyans dhiworth an Nessa Kwartron,

ha son bras an terroes dhiworth an breow.

11Kynewgh, a drigoryon Maktesh,

rag distruys yw oll an wikoryon,

treghys dhe-ves yw an re a boes arghans.

12Hag y hwyrvydh y'n termyn na y hwithrav Yerusalem gans lugern,

ha kessydhya an dus neb yw attes,

kowlys avel gwin gesys war an godhes:

neb a lever yn aga holonn,

‘Ny wra an Arloedh dader,

na ny wra drog.’

13Aga rychys a dheu ha bos preydh,

ha'ga chiow forsakys:

i a dhrehav chiow

heb triga ynna,

hag i a blans gwinlannow

heb eva aga gwin.

Dydh Meur an Arloedh

14Ogas yw dydh meur an Arloedh, ogas,

hag ow tos pur uskis,

lev dydh an Arloedh yw hwerow:

ena an kasor a skrij.

15Dydh a sorr yw an jydh na,

dydh anken hag ankres,

dydh arnow ha difeyth,

dydh tewlder ha tewlwolow,

dydh kommol ha tewlyjyon,

16dydh hirgorn ha garm kas

erbynn an sitys kerys

hag erbynn an touryow ughel.

17Ha my a dhre anken dhe'n dus

may kerdhons kepar ha dellyon,

rag i dhe begha erbynn an Arloedh:

ha skoellys vydh aga goes kepar ha doust,

ha'ga hig kepar ha kawgh.

18Naneyl aga arghans na'ga owr

a yll aga delivra

yn dydh sorr an Arloedh;

ha gans tan y avi

an norvys oll a vydh devorys:

rag ev a wra diwedh leun, yn sur neppyth euthyk,

a beub eus trigys y'n norvys.