Galow dhe Edrega

1Omguntellewgh war-barth, omguntellewgh,

a genedhel dhiveth;

2kyns an arghadow dhe vos dineythys,

kyns an jydh dhe dremena avel kulyn,

kyns sorr fers an Arloedh dhe dhos warnowgh, kyns dydh sorr an Arloedh

dhe dhos warnowgh.

3Hwilewgh an Arloedh, hwi oll, tus uvel an norvys

neb re wrug y vreus;

hwilewgh ewnder, hwilewgh uvelder:

martesen hwi a vydh gwithys

yn dydh sorr an Arloedh.

Breus erbynn Eskerens Yuda

4Rag Gaza a vydh forsakys

hag Ashkelon difeythtir:

tus Ashdod a vydh chasyes dhe-ves dhe hanter-dydh,

hag Ekron a vydh diwreydhys.

5Go-i trigoryon an arvor,

kenedhel an Kerethysi!

Ger an Arloedh yw er agas pynn:

A Kanan, bro an Filistysi,

my a'th tistru ma na vydh triger gesys.

6Ha'n arvor a vydh peurvaow,

prasow bugeledh,

ha korlannow rag greow.

7Ha'n arvor a vydh

rag remenant chi Yuda;

i a wra aga greow dhe beuri warnodho:

yn chiow Ashkelon

i a wrowedh gorthugherweyth; rag an Arloedh, aga Duw, a wra aga visitya,

ha treylya aga hethneth.

8My re glewas skorn Moab

ha despit an Ammonysi

may skornsons ow fobel,

ha gul godrosow bras erbynn aga or.

9Rakhenna ren ow bewnans, yn-medh Arloedh an luyow,

Duw Ysrael,

y fydh Moab kepar ha Sodom yn surredi,

ha an Ammonysi kepar ha Gomorra,

hwennek ha poll hoelan

ha difeyth a bes vynitha:

remenant ow fobel a's pyll,

ha'n re gesys a'm kenedhel a erit aga thir.

10Hemma a's tevydh drefenn aga goeth,

drefenn i dhe skornya hag omvoghhe

erbynn pobel Arloedh an luyow.

11Euthyk vydh an Arloedh dhedha:

rag ev a danowha oll duwow an norvys

ha tus a'n gordh,

peub dhiworth y le,

oll ynysow an kenedhlow.

12Hwi, A Kushysi ynwedh –

i a vydh ledhys gans ow kledha.

13Hag ev a ystynn y leuv erbynn an kledh

ha distrui Assyria,

ha gul Nineve yn difeyth,

sygh kepar ha'n gwylvos.

14Ha greow a wrowedh y'n kres anedhi,

oll bestes an kenedhlow:

an oula kornek ha'n klabytter

a annedh yn pennow hy filars;

aga lev a gan y'n fenestri;

diswrians a vydh y'n treudhowyow:

rag ev a lommha an parosweyth keder.

15Hemm yw an sita heudh

a vewa gans diagha,

a leveris yn hy holonn,

‘Ottavy, ha nyns eus denvyth marnas my.’

Ass yw hi gyllys yn difeyth,

growedhva rag bestes!

Pubonan a dremen dresti a hwiban

ha shakya y leuv.