Pegh Yerusalem ha'y Daswul

1Go-hi neb yw gorth ha defolys,

an sita owth arwaska!

2Ny obayas hi lev vytholl;

ny dhegemmeras dyskybleth;

ny drestyas y'n Arloedh;

ny nesas dh'y Duw.

3Hy fennsevigyon a-berth ynni

yw lewyon owth usa;

hy breusysi yw bleydhi an gorthugher;

ny asons an eskern bys y'n vorow.

4Direwl yw hy frofoesi,

falswesyon;

hy oferysi re dhefolas an sentri,

i re shyndyas an lagha.

5An Arloedh yw gwiryon a-berth ynni;

ny wra ev sherewneth:

myttin wosa myttin ev a re y vreus,

pub bora ny fyll ev;

mes ny woer an drogoberer meth.

6My re droghas an kenedhlow yn-mes:

forsakys yw aga thouryow;

my a dhifeythyas aga stretow

ma na dremen denvyth:

distruys yw aga sitys,

heb denvyth, heb annedhyas.

7My a leveris, ‘Ty a' fydh own ahanav yn surredi;

ty a dhegemmer dyskybleth’;

ena ny via hy annedh treghys dhe-ves

gans an kessydhyans oll a wrav er hy fynn.

Mes i a omdhegi yn freth,

legrys oll aga gwriansow.

8Rakhenna gwrewgh ow gortos, yn-medh an Arloedh,

bys y'n jydh pan savav avel dustunier:

rag kuntell an kenedhlow yw ow bodh

may keskorrav an gwlaskordhow

rag dinewi warnedha ow sorrvann,

oll ow sorr fers;

rag oll an norvys a vydh devorys

gans tan ow avi.

9Rag ena my a dhaskorr gweusyow pur dhe'n poblow

may halwons i oll war hanow an Arloedh

rag y servya gans unn akord.

10A-dhiworth tu arall avonyow Ethiopia

an dus a'm wordh, myrgh ow thus skattrys,

a dhre dhymm ow offrynn.

11Y'n jydh na ny vydhydh methek

a oll dha wriansow may hwrussys ynna drogober er ow fynn:

rag ena my a gemmer dhe-ves a-dhiworthis

an dus a lowenha y'th woeth

ha ny vydhydh goethus namoy

war ow menydh sans.

12My a as ynwedh a-berth ynnos

pobel boghosek ha gwann,

hag i a hwila skovva yn hanow an Arloedh.

13Ny wra remenant Ysrael sherewneth,

na leverel gowyow;

na ny vydh taves fekyl kevys yn aga ganow;

rag i a beur ha growedha,

ha denvyth ny wra dhedha perthi own.

Kan Lowena

14Kan yn lowen, a vyrgh Sion;

kri gans joy, a Ysrael;

bydh lowen ha fest heudhik a leun golonn,

a vyrgh Yerusalem.

15An Arloedh a gemmeras dhe-ves dha vreusow,

ev re fesyas dha eskar:

yma myghtern Ysrael, an Arloedh, a-berth ynnos:

ny' fydh own a dhroktra namoy.

16Y'n jydh na y leverir dhe Yerusalem:

Na borth own, a Sion;

na vedhes dha dhiwleuv lows.

17An Arloedh, dha Dhuw a-berth ynnos,

galloesek yw, ev a saw;

fest heudhik yw warnas gans lowena;

ev a vydh tawesek yn y gerensa,

ev a lowenha warnas gans kana,

18kepar hag yn dy'goel3:18 kepar hag yn dy'goel: Ow siwya an Septuagint. Ebrow My a guntell an re voredhek..

My a gemmer terroesa yn-mes ahanas;

i a veu begh warnas ha disenor.

19Otta, y'n termyn na

My a ober erbynn oll myns a'th arwask

y'n termyn na:

ha my a saw an deves klof,

ha kuntell an deves skattrys;

ha my a's sett rag gormel ha ger-da

yn oll an broyow a'ga meth.

20Y'n termyn na my a'gas dre,

y'n termyn may hwrav a'gas kuntell:

rag my a wra hanow ragowgh ha gormola

yn mysk oll poblow an norvys,

pan dreylyav agas kethneth

a-dherag agas dewlagas, yn-medh an Arloedh.