Barn Derfynol ar Israel

1Pan lefarai Effraim byddai dychryn;

yr oedd yn ddyrchafedig yn Israel;

ond pan bechodd gyda Baal, bu farw.

2Ac yn awr y maent yn pechu ychwaneg;

gwnânt iddynt eu hunain ddelw dawdd,

eilunod cywrain o arian,

y cyfan yn waith crefftwyr.

“Aberthwch13:2 Hebraeg, Aberthwyr. i'r rhai hyn,” meddant.

Pobl yn cusanu lloi!

3Felly byddant fel tarth y bore,

ac fel gwlith yn codi'n gyflym,

fel us yn chwyrlïo o'r llawr dyrnu,

ac fel mwg trwy hollt.

4“Myfi yw'r ARGLWYDD dy Dduw,

a'th ddygodd o wlad yr Aifft;

nid adwaenit Dduw heblaw myfi,

ac nid oedd achubydd ond myfi.

5Gofelais amdanat yn yr anialwch,

yn nhir sychder.

6Dan fy ngofal cawsant ddigon;

fe'u llanwyd, a dyrchafodd eu calon;

felly yr anghofiwyd fi.

7Minnau, byddaf fel llew iddynt;

llechaf fel llewpard ar ymyl y llwybr.

8Syrthiaf arnynt fel arth wedi colli ei chenawon,

rhwygaf gnawd eu mynwes,

ac yno traflyncaf hwy fel llew,

fel y llarpia anifail gwyllt hwy.

9“Pan ddinistriaf di, O Israel,

pwy fydd dy gynorthwywr?

10Ble yn awr mae dy frenin, i'th achub yn dy holl ddinasoedd,

a'th farnwyr, y dywedaist amdanynt,

‘Dyro inni frenin a thywysogion’?

11Rhoddais iti frenin yn fy nig,

ac fe'i dygais ymaith yn fy nghynddaredd.

12Rhwymwyd drygioni Effraim,

a storiwyd ei bechod.

13Pan ddaw poenau esgor,

am mai plentyn anghall ydyw,

ni esyd ei hun yn yr amser

ym man yr esgor.

14“A waredaf hwy o afael Sheol?

A achubaf hwy rhag angau?

O angau, ble mae dy blâu?

O Sheol, ble mae dy ddinistr?13:14 Felly Groeg a Syrieg. Hebraeg yn amwys.

Cuddiwyd trugaredd13:14 Neu, dialedd. oddi wrth fy llygaid.

15“Yn wir yr oedd yn dwyn ffrwyth ymysg brodyr,

ond daw dwyreinwynt, gwynt yr ARGLWYDD,

yn codi o'r anialwch;

â ei ffynnon yn hesb,

a sychir ei bydew;

dinoetha ei drysordy

o'i holl ddarnau gwerthfawr.

1613:16 Hebraeg, 14:1. Bydd Samaria yn euog,

am iddi wrthryfela yn erbyn ei Duw;

syrthiant wrth y cleddyf,

dryllir eu rhai bychain yn chwilfriw,

a rhwygir eu rhai beichiog yn agored.”