I'r Cyfarwyddwr: ar Susan Eduth. Michtam, i hyfforddi. I Ddafydd, pan oedd yn ymladd yn erbyn Aram-naharaim ac Aram-soba, a Joab yn dychwelyd ac yn lladd deuddeng mil o Edom yn Nyffryn yr Halen.

1O Dduw, gwrthodaist ni a'n bylchu;

buost yn ddicllon. Adfer ni!

2Gwnaethost i'r ddaear grynu ac fe'i holltaist;

trwsia ei rhwygiadau, oherwydd y mae'n gwegian.

3Gwnaethost i'th bobl yfed60:3 Tebygol. Hebraeg, weld. peth chwerw,

a rhoist inni win a'n gwna'n simsan.

4Rhoist faner i'r rhai sy'n dy ofni,

iddynt ffoi ati rhag y bwa.

Sela

5Er mwyn gwaredu dy anwyliaid,

achub â'th ddeheulaw, ac ateb ni.

6Llefarodd Duw yn ei gysegr,

“Yr wyf yn gorfoleddu wrth rannu Sichem

7a mesur dyffryn Succoth yn rhannau;

eiddof fi yw Gilead a Manasse,

Effraim yw fy helm,

a Jwda yw fy nheyrnwialen;

8Moab yw fy nysgl ymolchi,

ac at Edom y taflaf fy esgid;

ac yn erbyn Philistia y gorfoleddaf.”

9Pwy a'm dwg i'r ddinas gaerog?

Pwy a'm harwain60:9 Felly Fersiynau. Hebraeg, harweiniodd. i Edom?

10Onid ti, O Dduw, er iti'n gwrthod,

a pheidio â mynd allan gyda'n byddinoedd?

11Rho inni gymorth rhag y gelyn,

oherwydd ofer yw ymwared dynol.

12Gyda Duw fe wnawn wrhydri;

ef fydd yn sathru ein gelynion.