Jerwsalem yn cael dathlu

1Deffra! Deffra! Dangos dy nerth, Seion!

Gwisga dy ddillad hardd,

Jerwsalem, y ddinas sanctaidd!

Fydd y paganiaid aflan sydd heb eu henwaedu

byth yn dod i mewn i ti eto.

2Cod ar dy draed, ac ysgwyd y llwch oddi arnat,

eistedd ar dy orsedd, Jerwsalem!

Tynna’r gefynnau oddi am dy wddf

Seion, y gaethferch hardd!

3Dyma mae’r ARGLWYDD yn ei ddweud:

“Cawsoch eich gwerthu am ddim,

a fydd arian ddim yn eich rhyddhau chi.”

4Dyma mae’r Meistr, yr ARGLWYDD, yn ei ddweud:

“I ddechrau, aeth fy mhobl i fyw dros dro yn yr Aifft;

ac wedyn dyma Asyria yn eu gormesu nhw.

5Felly, beth sy’n digwydd yma?”

–meddai’r ARGLWYDD.

“Mae fy mhobl wedi’u cipio i ffwrdd am ddim rheswm,

ac mae’r rhai sy’n eu rheoli yn gwawdio.”

–meddai’r ARGLWYDD.

“Mae pethau drwg yn cael eu dweud amdana i drwy’r amser.

6Ond bryd hynny bydd fy mhobl yn fy nabod,

ac yn gwybod mai fi ydy’r un sy’n dweud,

‘Dyma fi!’”

7Mae mor wych gweld negesydd

yn dod dros y mynyddoedd

yn cyhoeddi fod heddwch.

Mae ganddo newyddion da –

mae e’n cyhoeddi achubiaeth

ac yn dweud wrth Seion,

“Dy Dduw di sy’n teyrnasu!”

8Clyw! Mae’r rhai sy’n gwylio dy furiau yn galw;

maen nhw’n gweiddi’n llawen gyda’i gilydd!

Maen nhw’n gweld, o flaen eu llygaid,

yr ARGLWYDD yn dod yn ôl i Seion.

9Gwaeddwch chithau hefyd,

adfeilion Jerwsalem!

Mae’r ARGLWYDD yn cysuro’i bobl

ac yn mynd i ollwng Jerwsalem yn rhydd.

10Mae’r ARGLWYDD wedi dangos ei nerth

i’r cenhedloedd i gyd,

ac mae pobl o ben draw’r byd yn gweld

ein Duw ni yn achub.

11Ewch! Ewch! I ffwrdd â chi!

Peidiwch cyffwrdd dim byd aflan!

Chi sy’n cario llestri’r ARGLWYDD,52:11 gw. Jeremeia 27:16; 28:3 ac Esra 1:7-10

cadwch eich hunain yn lân wrth fynd allan oddi yno.

12Ond does dim rhaid i chi adael ar frys

na dianc fel ffoaduriaid,

achos mae’r ARGLWYDD yn mynd o’ch blaen chi,

ac mae Duw Israel yn eich amddiffyn o’r tu cefn.

Y gwas sy’n dioddef

13“Edrychwch! Bydd fy ngwas yn llwyddo;

bydd yn cael ei ganmol a’i godi yn uchel iawn.

14Fel roedd llawer wedi dychryn o’i weld

yn edrych mor ofnadwy – prin yn ddynol

(doedd e ddim yn edrych fel dyn),

15bydd e’n puro52:15 puro Hebraeg, “taenellu”. llawer o genhedloedd.

Bydd brenhinoedd yn fud o’i flaen –

byddan nhw’n gweld rhywbeth oedd heb ei egluro,

ac yn deall rhywbeth roedden nhw heb glywed amdano.