Cam-drin pobl dlawd

1Ond wedyn dyma rai o’r dynion a’u gwragedd yn dechrau cwyno a protestio am eu cyd-Iddewon. 2Roedd rhai yn dweud, “Mae gynnon ni deuluoedd mawr, ac mae angen lot o ŷd arnon ni i allu bwyta a byw.” 3Roedd eraill yn dweud, “Dŷn ni’n gorfod morgeisio ein tir a’n gwinllannoedd a’n tai er mwyn prynu ŷd i osgoi llwgu.” 4Ac eraill eto, “Dŷn ni wedi gorfod benthyg arian i dalu trethi i’r brenin ar ein tir a’n gwinllannoedd. 5Dŷn ni wedi gorfod rhoi’n meibion a’n merched i weithio fel caethweision i bobl er ein bod ni a’n plant o’r un genedl ac yn rhannu’r un gwaed â nhw. Mae rhai o’n merched wedi cael eu cymryd oddi arnon ni, a dŷn ni’n gallu gwneud dim am y peth, am fod ein tir a’n gwinllannoedd yn nwylo pobl eraill.”

6Rôn i’n wyllt pan glywais i am hyn i gyd. 7Yna ar ôl ystyried y sefyllfa’n ofalus, dyma fi’n penderfynu mynd at y bobl gyfoethog a’r swyddogion i gwyno: “Dych chi i gyd yn codi llogau ar ddyledion eich pobl eich hunain!”

A dyma fi’n galw cyfarfod cyhoeddus i ddelio gyda’r peth. 8Dwedais yno, “Dŷn ni wedi gwneud popeth allwn ni i brynu’n ôl ein cyd-Iddewon sydd wedi’u gwerthu i’r cenhedloedd. A nawr dyma chi’n gwerthu’ch pobl eich hunain i’ch gilydd!” Doedden nhw’n gallu dweud dim. Doedd ganddyn nhw ddim ateb.

9Yna dyma fi’n dweud, “Dydy beth dych chi’n ei wneud ddim yn iawn! Dylech fyw mewn ffordd sy’n dangos parch at Dduw. Fyddai ddim rhaid i chi ddiodde eich gelynion, y cenhedloedd, yn eich gwawdio chi wedyn! 10Dw i a’m perthnasau a’r rhai sydd gyda ni yn benthyg arian ac ŷd i bobl. Rhaid stopio’r busnes yma o gymryd tir a thai pobl i dalu dyledion! 11Rhowch bopeth yn ôl iddyn nhw heddiw – eu caeau, eu gwinllannoedd, eu coed olewydd a’u tai, a’r llogau dych chi’n eu cymryd am fenthyg arian, ŷd, sudd grawnwin, ac olew olewydd iddyn nhw.”

12A dyma nhw’n ateb, “Gwnawn ni roi’r cwbl yn ôl, a stopio hawlio dim oddi arnyn nhw. Byddwn ni’n gwneud yn union fel rwyt ti’n dweud.” Yna dyma fi’n galw am offeiriaid a gwneud i’r bobl gyfoethog a’r swyddogion fynd ar eu llw y bydden nhw’n cadw eu gair. 13A dyma fi’n ysgwyd popeth o bocedi fy nillad, a dweud, “Dyma fydd Duw yn ei wneud i chi os fyddwch chi ddim yn cadw’ch gair. Byddwch yn colli’ch tai a’ch eiddo. Bydd yn eich ysgwyd chi a byddwch yn colli popeth!” A dyma pawb yn y gynulleidfa yn ateb, “Ia, wir! Amen!” ac addoli’r ARGLWYDD. Yna gwnaeth y bobl beth roedden nhw wedi’i addo.

Haelioni Nehemeia

14O’r diwrnod cyntaf y ces i fy ngwneud yn llywodraethwr Jwda – sef o’r ugeinfed flwyddyn i flwyddyn tri deg dau o deyrnasiad y Brenin Artaxerxes5:14 sef 445–433 CC. (un deg dwy o flynyddoedd i gyd) – wnes i a’m teulu ddim bwyta’r bwyd oedd yn cael ei roi i’r llywodraethwr. 15Roedd y llywodraethwyr o mlaen i wedi gosod beichiau trwm ar y bobl, a chymryd bwyd a gwin oddi arnyn nhw ar ben y dreth o 40 darn arian. Roedd eu staff yn galed ar y bobl hefyd. Ond wnes i ddim ymddwyn felly, am fy mod i’n parchu Duw. 16Es i ati fel pawb arall i weithio ar y wal, a wnes i ddim prynu tir i mi fy hun. Ac roedd fy staff i gyd yn gweithio yno hefyd.

17Roedd cant a hanner o bobl, swyddogion yr Iddewon, yn bwyta gyda mi’n rheolaidd, heb sôn am ymwelwyr oedd yn dod o wledydd eraill. 18Bob dydd roedd un ych, chwech o’r defaid gorau, a ffowls yn cael eu paratoi i mi, heb sôn am ddigonedd o win o bob math oedd yn cael ei roi i mi bob deg diwrnod. Er hynny, wnes i ddim hawlio’r bwyd oedd yn cael ei roi i’r llywodraethwr, am fod y baich yn drwm ar y bobl.

19O Dduw, cofia hyn o’m plaid i – popeth dw i wedi’i wneud i’r bobl yma.