SALM 83

Cân neu Salm Asaff.

1O Dduw, na ostega: na thaw, ac na fydd lonydd, O Dduw.

2Canys wele, dy elynion sydd yn terfysgu; a’th gaseion yn cyfodi eu pennau.

3Ymgyfrinachasant yn ddichellgar yn erbyn dy bobl, ac ymgyngorasant yn erbyn dy rai dirgel di.

4Dywedasant, Deuwch, a difethwn hwynt fel na byddont yn genedl; ac na chofier enw Israel mwyach.

5Canys ymgyngorasant yn unfryd; ac ymwnaethant i’th erbyn;

6Pebyll Edom, a’r Ismaeliaid; y Moabiaid, a’r Hagariaid;

7Gebal, ac Ammon, ac Amalec; y Philistiaid, gyda phreswylwyr Tyrus.

8Assur hefyd a ymgyplysodd â hwynt: buant fraich i blant Lot. Sela.

9Gwna di iddynt fel i Midian; megis i Sisera, megis i Jabin, wrth afon Cison:

10Yn Endor y difethwyd hwynt: aethant yn dail i’r ddaear.

11Gwna eu pendefigion fel Oreb, ac fel Seeb; a’u holl dywysogion fel Seba, ac fel Salmunna:

12Y rhai a ddywedasant, Cymerwn i ni gyfanheddau Duw i’w meddiannu.

13Gosod hwynt, O fy Nuw, fel olwyn; fel sofl o flaen y gwynt.

14Fel y llysg tân goed, ac fel y goddeithia fflam fynyddoedd;

15Felly erlid di hwynt â’th dymestl, a dychryna hwynt â’th gorwynt.

16Llanw eu hwynebau â gwarth; fel y ceisiont dy enw, O Arglwydd.

17Cywilyddier a thralloder hwynt yn dragywydd; ie, gwaradwydder a difether hwynt:

18Fel y gwypont mai tydi, yr hwn yn unig wyt JEHOFAH wrth dy enw, wyt Oruchaf ar yr holl ddaear.