CAB. X

1Nish ren ny Philistinee caggey noi Israel, as roie deiney Israel er-chea roish ny Philistinee, as huitt ad sheese lesh cragh trome ayns cronk Gilboa. 2As deiyr ny Philistinee dy chion er Saul as e vac, as varr ny Philistinee Jonathan, as Abinadab, as Malchi-shua, mec Saul. 3As hie’n caggey dy creoi noi Saul, as haink ny sideyryn stiagh er, as v’eh lhottit dy baase lioroo. 4Eisht dooyrt Saul rish e armyder, Tayrn dty chliwe, as roie mee trooid lesh; er-aggle dy jig ny chymmyltee shoh, dy voggyssagh harrym. Agh cha jinnagh e armyder laue er, son va rouyr aggle er. Myr shen ghow Saul cliwe, as huitt eh er. 5As tra honnick e armyder dy row Saul marroo, huitt eshyn myrgeddin er e chliwe, as hooar eh baase. 6Myr shoh hooar Saul baase, as ny three mec echey, as ooilley ny va mârish myrgeddin. 7As tra chronnee ooilley deiney Israel, v’ayns y choan, dy ren ad chea, as dy row Saul as e vec marroo: eisht hreig ad ny ard-valjyn oc, as chossyn ad roue: as haink ny Philistinee as ren ad cummal ayndoo.

8As haink eh gy-kione, laa-ny-vairagh, tra haink ny Philistinee dy roostey ny merriu, dy dooar ad Saul, as e vec er duittym ayns cronk Gilboa. 9As tra v’ad er roostey eh, ghow ad e chione, as e eilley-caggee, as hug ad fys gys cheer ny Philistinee ooilley mygeayrt, dy chur lhieu y naight gys ny jallooyn oc, as gys y pobble. 10As chur ad yn eilley-caggee echey ayns thie nyn yallooyn, as hrogh ad seose e chione ayns chiamble Dagon.

11As tra va ooilley Jabesh-gilead er chlashtyn ooilley ny va ny Philistinee er n’yannoo rish Saul; 12Dirree ooilley ny deiney niartal, as ghow ad ersooyl corp Saul, as kirp ny mec echey, as hug ad lhieu ad gys Jabesh; as doanluck ad ny craueyn oc fo’n villey-darragh t’ayns Jabesh, as ren ad trostey shiaght laa.

13Shoh myr hooar Saul baase son e vee-viallys noi’n Chiarn, eer noi sarey’n Chiarn nagh ren eh cooilleeney; as myrgeddin son shirrey coyrle jeh ben faishnee, dy vriaght j’ee; 14As nagh hir eh coyrle veih’n Chiarn: shen-y-fa v’eh er ny stroie, as e reeriaght er ny choyrt da David mac Jesse.