CAB. XI

1Eisht ren ooilley Israel ad-hene y haglym cooidjagh gys David, ec Hebron, gra, Cur-my-ner, ta shin dty chraue as dt’eill. 2As marish shoh cha voddey er-dy-henney, eer tra va Saul ny ree, uss v’eh, hie magh as stiagh roish Israel ayns caggey: as rhyt’s dooyrt y Chiarn dty Yee, Uss nee bochillagh my phobble Israel, as uss nee reill harrish my phobble Israel. 3Shen-y-fa haink ooilley shanstyr Israel gys y ree, gys Hebron, as ren David conaant roo, ayns Hebron, fenish y Chiarn, as ren ad David y ooilaghey ny ree harrish Israel, cordail rish goo’n Chiarn, liorish Samuel.

4As hie David as ooilley Israel gys Jerusalem, ta shen, Jebus, raad va ny Jebusiteyn, cummaltee yn cheer. 5As dooyrt cummaltee Jebus rish David, Cha jig lhiat’s cheet stiagh ayns shoh. Ny-yeih ghow David cashtal Zion, ta shen ard-valley Ghavid. 6As dooyrt David, Quoi-erbee hoshiaght vrishys stiagh er ny Jebusiteyn, bee eh ny ard-ghooinney as captan. Myr shen hie Joab mac Zeruiah seose hoshiaght, as eh va’n ard-ghooinney. 7As ren David cummal ayns y chashtal, shen-y-fa, denmys ad eh, Ard-valley Ghavid. 8As hrog eh yn ard-valley ooilley mygeayrt, eer veih Millo: as ren Joab coamrey yn chooid elley jeh’n ard-valley. 9Myr shen daase David ny s’troshey as ny s’troshey: son va’n Chiarn y cheshaght-chaggee mârish.

10Ad shoh myrgeddin ard-leeideilee ny deiney toshee, v’ec David, hass dy dunnal liorish ayns e reeriaght, lesh ooilley Israel, dy yannoo eh ny ree, cordail rish goo’n Chiarn, mychione Israel. 11As shoh earroo ny deiney toshee, v’ec David; Jashobeam ny Hachmonite, yn ard-chaptan: hrog eh shleiy noi three cheead, stroie eh ec un cheayrt. 12As ny lurg-syn, va Eleazar, mac Dodo, yn Ahohite, va fer jeh ny three treanee. 13V’eshyn marish David ec Pas-dammim, as ayns shen va ny Philistinee er nyn jaglym cooidjagh gys caggey, raad va peesh dy ghrunt fo oarn; as ren y pobble chea roish ny Philistinee. 14As hass ad, mygeayrt y ghrunt shen, as haue ad eh, as varr ad ny Philistinee, as ren y Chiarn ad y hauail liorish livrey cronnal.

15Nish, hie three jeh ny jeih captanyn as feed sheese gys y charrick raad va David, ayns ooig Adullam, as ghow sheshaght-caggee ny Philistinee yn magher ayns coan Rephaim. 16As va David eisht ayns y charrick, as va garrison ny Philistinee y traa shen ec Beth-lehem. 17As haink mian er David, as dooyrt eh, Oh, dy jinnagh fer ennagh jough dou, jeh ushtey chibbyr Veth-lehem, ta liorish y yiat. 18As vrish y three trooid sheshaght-caggee ny Philistinee, as hayrn ad ushtey ass chibbyr Veth-lehem, va liorish y yiat; as hug ad lhieu eh gys David: agh dob David giu jeh, agh gheayrt eh magh eh myr oural gys y Chiarn, 19As dooyrt eh, Ny lhig eh Jee dy jinnin’s lheid y red: jean-yms giu fuill ny deiney shoh, t’er choyrt nyn mioys ayns gaue? son lesh gaue nyn mioys hug ad lhieu eh: Shen-y-fa cha jinnagh eh giu jeh. Ny reddyn shoh ren ny three s’treanee shoh.

20As Abishai braar Yoab va’n ard-er jeh’n three: son hrog eh seose e shleiy noi three cheead, as varr eh ad, as echeysyn va’n ennym s’ooasle jeh’n three. 21V’eh ny s’onnoroil na’n jees; son v’eh ny chaptan orroo: ny-yeih cha daink eh seose gys y chied three. 22Benaiah mac Jehoiada, mac dy ghooinney mooar caggee ayns Kabzeel va dy mennick er choyrt prowal jeh e ghunnallys: varr eh daa ghooinney myr lionyn ec Moab: hie eh sheese myrgeddin as varr eh lion ayns ooig, er laa sniaghtee. 23As varr eh Egyptian, dooinney feer thollee, queig cubityn er yrjid; as ayns laue yn Egyptian va shleiy myr garmin fidderagh; as hie eh sheese noi lesh lorg, as ghlack eh yn shleiy ass laue yn Egyptian, as varr eh eh lesh y shleiy echey hene. 24Ny reddyn shoh ren Benaiah, mac Jehoiada, as va goo echey mastey ny three treanee. 25Cur-my-ner, v’eh onnoroil mastey ny jeih as feed, agh cha daink eh seose gys y chied three: as ren David soiaghey eh harrish e ghard hene.

26Ny deiney dunnal elley jeh ny sheshaghtyn-caggee va, Asahel, braar Yoab, Elhanan mac Dodo jeh Beth-lehem, 27Shammoth yn Harorite, Helez yn Pelonite, 28Ira, mac Ikkesh yn Tekoite, Abiezer yn Antothite, 29Sibbecai yn Hushathite, Ilai yn Ahohite, 30Maharai yn Netophathite, Heled, mac Baana yn Netophathite, 31Ithai, mac Ribai jeh Gibeah, va bentyn gys cloan Venjamin, Benaiah yn Pirathonite, 32Hurai veih strooanyn Gaash, Abiel yn Arbathite. 33Azmaveth yn Baharumite, Eliahba yn Shaalbonite, 34Mec Hashem yn Gizonite, Jonathan, mac Shage yn Hararite, 35Ahiam, mac Sacar yn Hararite, Eliphal mac Ur, 36Hepher yn Mecherathite, Ahijah yn Pelonite, 37Hezro yn Carmelite, Naarai mac Ezbai, 38Joel braar Nathan, Mibhar mac Haggeri, 39Zelek yn Ammonite, Naharai yn Berothite, armyder Yoab mac Zeruiah, 40Ira yn Ithrite, Gareb yn Ithrite, 41Uriah yn Hittite, Zabad mac Ahlai, 42Adina, mac Shiza yn Reubenite, captan ny Reubeniteyn, as jeih as feed mârish, 43Hanan mac Maachah, as Joshaphat yn Mithnite, 44Uzzia yn Ashterathite, Shama, as Jehiel mec Hothan yn Aroerite, 45Jediael mac Shimri, as Joha e vraar, yn Tizite, 46Eliel yn Mahavite, as Jeribai, as Joshaviah, mec Elnaam, as Ithmah yn Moabite, 47Eliel, as Obed, as Jasiel yn Mesobaite.