CAB. XII

1Nish ad shoh adsyn haink gys David ec Ziklag, choud’s v’eh foast freayll eh-hene dy follit, kyndagh rish Saul mac Kish: as v’ad mastey ny deiney niartal, fir-choonee [Ghavid] ’sy chaggey. 2V’ad armit lesh bowghyn, as co-jesh lesh dagh laue, ayns ceau claghyn ass sling, as lhiggey sideyn ass bow, eer jeh kynney Saul jeh Benjamin. 3Yn ard-er va Ahiezer, eisht Joash, mec Shemaah yn Gibeathite; as Jeziel, as Pelet, mec Azmaveth: as Berachah, as Jehu yn Antothite. 4As Ishmaiah yn Gibeonite, dooinney niartal mastey ny jeih as feed, as erskyn ny jeih as feed; as Jeremiah, as Jahaziel, as Johanan, as Josabad yn Gederathite, 5Eluzai, as Jerimoth, as Bealiah, as Shemariah, as Shephatiah yn Haruphite, 6Elkanah, as Jesiah, as Azareel, as Joezer, as Jashobeam, ny Korhiteyn, 7As Joelah, as Zebadiah, mec Jehoram jeh Gedor. 8As jeh ny Gaditeyn haink stiagh gys David gys y charrick ’syn aasagh, deiney niartal, as reih deiney caggee, aghtal dy loaghtey shleiy as scape; ny eddinyn oc va goll-rish eddinyn lionyn, as gastey myr feeaih er ny sleityn: 9Ezer y chied er, Obadiah yn nah er, Eliab y trass er, 10Mishmannah yn chiarroo, Jeremiah yn wheiggoo, 11Attai yn cheyoo, Eliel yn chiaghtoo. 12Johanan yn hoghtoo, Elzabad yn nuyoo, 13Jeremiah yn jeihoo, Machbanai yn un er jeig. 14V’ad shoh jeh mec Ghad, captanyn ’sy cheshaght-chaggee, yn fer s’melley jeu va harrish keead, as y fer s’treanee harrish thousane. 15Shoh adsyn hie harrish Jordan ayns y chied vee, tra va’n thooilley er lhieeney harrish ooilley e brooinyn; as deiyr ad ersooyl ooilley cummaltee ny coanyn, chammah shiar as sheear. 16As haink sheshaght dy chloan Venjamin, as Yudah, gys y charrick raad va David. 17As hie David magh nyn guail, as dreggyr eh, as dooyrt eh roo, My ta shiu er jeet hym dy sheeoil dy chooney lhiam, bee my chree sniemmit hiu: agh my ta shiu er jeet dy my vrah gys my noidyn, fakin nagh vel aggair ayns my laueyn, dy jean Jee nyn ayraghyn jeeaghyn er, as briwnys. 18Eisht haink y spyrryd er Amasa, va’n ard-er jeh ny captanyn, as dooyrt eh; Lhiat’s ta shin, Ghavid, as er y cheu ayd’s, uss vac Yesse; shee, shee dy row hood, as shee gys dty ir-choonee; son ta dty Yee cooney lhiat. Eisht ren David goaill roo, as ren eh ad captanyn ’sy cheshaght. 19As haink paart jeh Manasseh harrish gys David (tra hie eh marish ny Philistinee noi Saul gys y chaggey: agh cha ren ad cooney lhieu: son er aa-choyrle, hug chiarnyn ny Philistinee ersooyl eh, gra, Tuittee eh gys e vainshtyr Saul, gys gaue y vioys ainyn). 20Myr v’eh chyndaa gys Ziklag, huitt huggey jeh Manasseh, Adnah, as Jozabad, as Jediael, as Michael, as Jozabad, as Elihu, as Zilthai, captanyn thousaneyn Vanasseh. 21As chooin ad lesh David noi sheshaght ny roosteyryn: son v’ad ooilley deiney niartal caggee, as captanyn ’sy cheshaght. 22Son ec y traa shen haink ad laa lurg laa gys David dy chooney lesh, derrey ve sheshaght vooar caggee, ymmodee erskyn earroo.

23As shoh coontey ny sheshaghtyn va slane armit son y chaggey, as haink gys David gys Hebron, dy chaghlaa reeriaght Saul huggeysyn, cordail rish goo’n Chiarn. 24Cloan Yudah gymmyrkey scape as shleiy va shey thousaneyn as hoght cheead, slane armit son y chaggey. 25Jeh cloan Simeon, deiney niartal caggee dunnal, shiaght thousaneyn as un cheead. 26Jeh cloan Levi, kiare thousaneyn as shey cheead. 27As Jehoiada va leeideilagh ny Aaroniteyn, as mârish va three thousaneyn as shiaght cheead. 28As Zadok, dooinney aeg, niartal as dunnal, as jeh thie e ayrey daa chaptan as feed. 29As jeh cloan Venjamin dy chynney Saul, three thousaneyn: son gys y traa shoh, va’n ayrn smoo jeu er lhiantyn gys reill thie Saul. 30As jeh cloan Ephraim, feed thousane as hoght cheead, deiney niartal as dunnal, ooasle ayns thie nyn ayraghyn. 31As jeh lieh-tribe Vanasseh hoght thousaneyn jeig hug stiagh nyn enmyn, dy heet as dy yannoo David ny ree. 32As jeh cloan Issachar, va deiney tushtagh mysh ny imbaghyn, dy choyrt roish Israel cre v’oc dy yannoo: yn earroo oc va daa cheead; as va ooilley ny braaraghyn oc fo nyn reill. 33Jeh Zebulun, lheid as hie magh gys y chaggey, schleioil ’sy vagher, lesh dy chooilley ghreïe-caggee, jeih thousaneyn as da-eed, aghtal ayns nyn rankyn: cha row ad jeh cree dooble. 34As jeh Naphtali thousane captan, as mâroosyn, lesh scape as shleiy, shiaght-jeig as feed. 35As jeh ny Daniteyn, schleioil ayns caggey, hoght thousaneyn as feed as shey cheead. 36As jeh Asher, lheid as hie magh gys caggey, schleioil ’sy vagher, da-eed thousane. 37As er cheu elley dy Yordan jeh ny Reubeniteyn, as ny Gaditeyn, as jeh lieh-tribe Vanasseh, lesh dy chooilley horch dy ghreïnyn-caggee, shey-feed thousane. 38Ooilley ny deiney caggee shoh, va aghtal ’sy vagher-caggee, haink ad lesh aigney creeoil gys Hebron, dy yannoo David ny ree harrish ooilley Israel: as va ooilley’n chooid elley jeh Israel myrgeddin jeh un chree dy yannoo David ny ree. 39As shen y raad v’ad marish David three laa, gee as giu, son va nyn mraaraghyn er chiarail ro-laue dy palchey nyn gour. 40Adsyn myrgeddin v’er-gerrey daue, eer derrey Issachar, as Zebulun, as Naphtali, hug ad lhieu er assylyn, as er camelyn, as er muleyn, as er dew, arran, as feill, meinn, as cabbaagyn-figgagh, as dossanyn dy raisinyn, as feeyn, as ooil, as dew, as kirree er y phalchey: son va boggey ayns Israel.