CAB. XIII

1As ghow David coyrle marish ny captanyn thousaneyn as keeadyn, as marish dy chooilley leeideilagh. 2As dooyrt David rish ooilley sheshaght Israel va kionfenish, My s’taittin lhieu eh, as dy bee eh aigney’n Chiarn nyn Yee, lhig dooin fys y choyrt magh gys nyn mraaraghyn ayns dy chooilley ard, ta faagit ayns ooilley cheer Israel, as mâroosyn myrgeddin gys ny saggyrtyn as ny Leviteyn t’ayns nyn ard-valjyn, as mygeayrt-y-moo, dy bee ad er nyn jaglym cooidjagh hooin. 3As lhig dooin cur lhien reesht arg nyn Yee hooin: son cha ren shin shirrey huggey son coyrle ayns laghyn Saul. 4As dooyrt ooilley’n pobble, dy jinnagh ad myr shen: son va’n chooish mie ayns sooillyn ooilley’n pobble. 5Myr shen haggil David ooilley Israel cooidjagh veih Shihor jeh Egypt, eer gys slystyn Hemath, dy chur lhieu arg Yee veih Kirjath-jearim. 6As hie David seose, as ooilley Israel, gys Baalah, ta shen Kirjath-jearim, ayns Judah, dy chur lhieu seose veih shen arg Yee yn Chiarn, ta cummal eddyr ny cherubim, raad t’ad geamagh er e ennym. 7As chur ad lhieu arg Yee ayns cart noa, ass thie Abinadab; as Uzza as Ahio ren geiyrt y chart. 8As chloie David as ooilley Israel kiongoyrt rish Jee lesh ard choraa, as lesh kiaulleeaght, as lesh claasaghyn, as lesh psaltereeyn, as lesh timbrelyn, as lesh cymballyn, as lesh trumpetyn.

9As tra haink ad gys laare-vooie Chidon, heeyn Uzza magh e laue, dy ymmyrkey fo yn arg: son ren ny dew snapperal. 10As va corree’n Chiarn er ny vrasnaghey noi Uzza, as woaill eh eh, er-yn-oyr dy dug eh e laue er yn arg: as ayns shen hooar eh baase kiongoyrt rish Jee: 11As va David seaghnit, er-yn-oyr dy row’n Chiarn er n’yannoo brishey er Uzza; shen-y-fa ta’n ynnyd shen enmyssit Perez-uzza gys y laa jiu. 12As va David ayns aggle roish Jee er y laa shen, gra, Kys s’loys dou arg Yee ’ghoaill thie hym? 13Myr shen cha dug David lesh yn arg thie huggey hene gys ard-valley Ghavid, agh chur eh lesh eh dy lhiattee stiagh gys thie Obed-edom yn Gittite. 14As va arg Yee faagit ayns thie Obed-edom three meeaghyn. As vannee’n Chiarn Obed-edom, as ooilley ny v’echey.