CAB. XV

1As hrog David thieyn da hene ayns ard-valley Ghavid, as chiartee eh ynnyd son arg Yee, as ren eh cabbane y hoiaghey seose er e hon. 2Eisht dooyrt David, Cha vel eh lowit da feallagh erbee dy ymmyrkey arg Yee agh ny Leviteyn: son adsyn ta’n Chiarn er reih dy chur lhieu arg Yee, as dy yannoo shirveish da, son dy bragh. 3As haggil David ooilley Israel cooidjagh gys Jerusalem, dy chur lhieu arg y Chiarn seose gys e ynnyd, v’eh er chiarail er e hon. 4As haggil David cloan Aaron, as ny Leviteyn. 5Jeh mec Kohath, Uriel yn ard-er, as e vraaraghyn, shey-feed. 6Jeh mec Merari, Asaiah yn chied er, as e vraaraghyn daa cheead as feed. 7Jeh mec Ghershom, Joel yn ard-er, as e vraaraghyn shey-feed as jeih. 8Jeh mec Elizaphan, Shemaiah yn ard-er, as e vraaraghyn daa cheead. 9Jeh mec Hebron, Eliel yn ard-er, as e chynney kiare-feed. 10Jeh mec Uzziel, Amminadab yn ard-er, as e vraaraghyn keead as ghaa-yeig. 11As deïe David er Zadok as Abiathar ny saggyrtyn, as er ny Leviteyn, er Uriel, Asaiah, as Joel, Shemaiah, as Eliel, as Amminadab. 12As dooyrt eh roo, Shiuish ard-gheiney ayraghyn ny Leviteyn: jean-jee chammah shiu hene as nyn mraaraghyn y chasherickey, dy vod shiu arg y Chiarn Jee Israel y choyrt lhieu seose, gys yn ynnyd shen, ta mee er chiarail ny chour. 13Son er-yn-oyr nagh ren shiu shoh ec y toshiaght, ta’n Chiarn nyn Yee er n’yannoo brishey orrin, son nagh hir shin eh myr v’eh hene er harey. 14Myr shen ren ny saggyrtyn as ny Leviteyn ad-hene y chasherickey, dy chur lhieu seose arg y Chiarn, Jee Israel. 15As dymmyrk cloan ny Leviteyn arg Yee er nyn gheayltyn, lesh ny looghyn, myr doardee Moses cordail rish goo’n Chiarn. 16As loayr David rish leeideilee ny Leviteyn, dy phointeil nyn mraaraghyn dy yannoo bingys lesh greinyn-kiaullee, psaltereeyn, as claasaghyn, as cymballyn feiyral, as lesh ard-voggey troggal seose nyn goraa. 17Er shoh phoint ny Leviteyn Heman mac Joel; as jeh e vraaraghyn, Asaph mac Berechiah; as jeh mec Merari ny braaraghyn oc, Ethan mac Kushaiah; 18As mâroosyn jeh nyn mraaraghyn jeh’n nah order, Zechariah, Ben, as Jaaziel, as Shemiramoth, as Jehiel, as Unni, Eliab, as Benaiah, as Maaseiah, as Mattithiah, as Elipheleh, as Mikneiah, as Obed-edom, as Jeiel, ny porteryn. 19Myrgeddin va ny arranee, Heman, Asaph, as Ethan, pointit dy yannoo kiaulleeaght lesh cymballyn prashey. 20As Zechariah, as Aziel, as Shemiramoth, as Jehiel, as Unni, as Eliab, as Maaseiah, as Benaiah, lesh psaltereeyn er Alamoth. 21As Mattithiah, as Elipheleh, as Mikneiah, as Obed-edom, as Jeiel, as Ahaziah, lesh claasaghyn er y Sheminith. 22As Chenaniah, va’n ard-arraneagh jeh ny Leviteyn: mainshtyr-ynsee ny arraneyn-moyllee, son v’eh schleioil. 23As er Berechiah, as Elkanah va currym dorrys yn arg. 24As liorish Shebaniah, as Jehoshaphat, as Nethaneel, as Amasai, as Zechariah, as Benaiah, as Eliezer ny saggyrtyn va ny trumpetyn er ny hellym roish arg Yee: as Obed-edom as Jehiah va geiyrt er yn arg.

25Myr shen hie David as shanstyr Israel, as captanyn ny thousaneyn dy choyrt lhieu seose arg conaant y Chiarn, ass thie Obed-edom lesh boggey. 26As haink eh gy-kione myr va Jee cooney lesh ny Leviteyn va gymmyrkey arg conaant y Chiarn; dy heb ad shiaght dew, as shiaght reaghyn. 27As va David er ny choamrey lesh garmad dy aanrit keyl, as ooilley ny Leviteyn va fo’n arg, as ny arranee, as Chenaniah mainshtyr yn arrane, marish ny fir-chiaullee: va er David neesht ephod aanrit. 28Shoh myr hug ooilley Israel lhieu seose arg conaant y Chiarn lesh yllagh, as lesh feiyr y chornet, as lesh trumpetyn, as lesh cymballyn, jannoo kiaull lesh psaltereeyn as claasaghyn.

29As haink eh gy-kione, tra va arg conaant y Chiarn er roshtyn gys ard-valley Ghavid, dy ren Michal, inneen Saul, myr v’ee jeeaghyn magh er yn uinniag, fakin ree David daunsin as lheimyragh: as ren ee soiaghey beg jeh ayns e cree.