CAB. XVI

1Myr shen hug ad lhieu arg Yee, as hoie ad eh ayns mean y chabbane va David er hroggal er e hon: as heb ad ourallyn-losht, as ourallyn-shee kiongoyrt rish Jee. 2As tra va David erreish chebbal ny ourallyn-losht, as ny ourallyn-shee, dy vannee eh yn pobble ayns ennym y Chiarn. 3As rheynn eh er dagh unnane ayns Israel, chammah dooinney as ben, bwilleen arran, as peesh mie dy eill, as cappan feeyney.

4As phoint eh sheshaght jeh ny Leviteyn dy hirveish kiongoyrt rish arg y Chiarn, as dy ockley magh, as dy choyrt booise, as moylley, da’n Chiarn Jee Israel: 5Asaph y chied er, as by-niessey dasyn Zechariah, Jeiel, as Shemiramoth, as Jehiel, as Mattithiah, as Eliab, as Benaiah, as Obed-edom: as Jeiel lesh psaltereeyn, as lesh claasaghyn; agh ren Asaph kiaull lesh cymballyn. 6Benaiah myrgeddin as Jahaziel ny saggyrtyn lesh trumpetyn dy kinjagh kiongoyrt rish arg conaant Yee.

7Eisht, er y laa shen ren David toshiaght er y chirveish lesh y psalm shoh, ren eh livrey gys laue Asaph as e vraaraghyn, dy choyrt booise da’n Chiarn. 8Cur-jee booise da’n Chiarn, eïe-jee er e ennym, jean-jee e obbraghyn y hoilshaghey mastey’n pobble. 9Gow-jee arraneyn, gow-jee arraneyn-moyllee huggey, loayr-jee jeh ooilley e obbraghyn yindyssagh. 10Gow-jee boggey ayns e ennym casherick; lhig da’n cree ocsyn ve gennal ta shirrey lurg y Chiarn. 11Shir-jee’n Chiarn as e niart, shir-jee e eddin dy kinjagh. 12Cooinee-jee er ny obbraghyn yindyssagh t’eh er n’yannoo, e virrilyn, as briwnyssyn e veeal; 13O shiuish sluight Israel e harvaant, shiuish chloan Yacob e vooinjer reiht. 14Eshyn y Chiarn nyn Yee, ta e vriwnyssyn ayns ooilley’n seihll. 15Cooinee-jee dy kinjagh er e chonaant: yn goo t’eh er harey da thousaneyn dy heelogheyn; 16Eer y conaant shen ren eh rish Abraham, as y breearrey hug eh da Isaac: 17Shen doardee eh da Jacob son leigh, as da Israel son conaant dy bragh farraghtyn, 18Gra, Dhyt’s ver-ym’s cheer Chanaan, cronney nyn eiraght. 19Tra nagh row shiu agh beggan, eer beggan beg, as joarreeyn ayn; 20As tra v’ad scughey veih ashoon gys ashoon, as veih reeriaght gys reeriaght; 21Cha lhig eh da dooinney erbee aggair ’yannoo daue: agh hug eh oghsan da eer reeaghyn er y ghraih oc, 22Gra, Ny benn-jee rish my er-ooilit: as ny jean-jee veg yn aggair da my adeyryn. 23Gow-jee arrane gys y Chiarn, ooilley’n seihll: soilshee-jee magh e haualtys veih laa gy laa. 24Insh-jee magh e ghloyr mastey ny ashoonee; e obbraghyn yindyssagh mastey dy chooilley ashoon. 25Son s’mooar ta’n Chiarn, as dy mooar dy ve er ny voylley: ta aggle dy ve goit roish erskyn dy chooilley Yee. 26Son cha vel ooilley jeeghyn y pobble agh jallooyn; agh y Chiarn t’er chroo ny niaughyn. 27Ta gloyr as ooashley ayns e enish; ta niart as gennallys ayns ynnyd e chasherickys. 28Cur-jee da’n Chiarn, shiuish chynneeyn y pobble, cur-jee da’n Chiarn gloyr as niart: 29Cur-jee da’n Chiarn y ghloyr cooie da e ennym, cur-jee lhieu ourallyn, as tar-jee kiongoyrt rish: cur-jee ooashley da’n Chiarn ayns aalid e chasherickys. 30Gow-jee aggle kiongoyrt rish, ooilley’n seihll: bee’n seihll myrgeddin cha shickyr, nagh bee eh er ny scughey. 31Lhig da ny niaughyn ve gennal, as lhig da’n thalloo boggey ghoaill: as lhig da ve raït mastey ny ashoonyn, Ta’n Chiarn reill. 32Lhig da’n faarkey feiyral, lesh slane laanid: lhig da ny magheryn boggey ’ghoaill, as ooilley ny t’ayndoo. 33Eisht nee ooilley biljyn ny keylley troggal seose arrane fenish y Chiarn, son dy vel eh cheet dy vriwnys y theihll. 34O cur-jee booise da’n Chiarn; son s’mie t’eh: son ta e vyghin farraghtyn son dy bragh. 35As abbyr-jee, Saue shin, O Yee nyn saualtys, as chaggil shin cooidjagh, as livrey shin veih ny ashoonee, dy vod mayd booise ’choyrt da dty ennym casherick, as boggyssagh ayns dty voylley. 36Bannit dy row’n Chiarn Jee Israel son dy bragh. As dooyrt ooilley’n pobble, Amen, as hug ad moylley da’n Chiarn.

37As shoh myr daag eh ayns shen kiongoyrt rish arg conaant y Chiarn, Asaph as e vraaraghyn, dy yannoo shirveish kiongoyrt rish yn arg dy kinjagh, lurg nyn gurrym gagh-laa: 38As Obed-edom, marish nyn mraaraghyn three-feed as hoght; Obed-edom elley mac Jeduthun, as Hosah, dy ve porteryn: 39As Zadok y saggyrt, as e vraaraghyn ny saggyrtyn, kiongoyrt rish cabbane-agglish y Chiarn, ayns yn ard-ynnyd v’ec Gibeon, 40Dy hebbal ourallyn-losht gys y Chiarn er altar yn oural-losht kinjagh, moghrey as fastyr, as dy yannoo cordail rish ooilley ny ta scruit ayns leigh’n Chiarn, doardee eh da Israel: 41As mâroosyn Heman as Jeduthun, as ny deiney reiht elley, va enmyssit, dy choyrt booise da’n Chiarn, son dy vel e vyghin farraghtyn son dy bragh; 42As mâroosyn Heman as Jeduthun lesh trumpetyn as cymballyn son ard-vingys, as lesh greinyn-kiaullee elley dy choyrt moylley da Jee. As va mec Jeduthun ny porteryn. 43As hie ooilley’n pobble roue dagh dooinney gys e hie hene: as hyndaa David dy heeaney e hie hene.