CAB. XVII

1Nish haink eh gy-kione myr va David ny hoie ayns e hie, dy dooyrt David rish Nathan y phadeyr, Cur-my-ner, ta mish cummal ayns thie cedaragh, agh ta arg conaant y Chiarn fo coodagh curtanyn. 2Eisht dooyrt Nathan rish David, Jean ooilley ny t’ayns dty chree; son ta Jee mayrt.

3As haink eh gy-kione yn oie cheddin, dy daink goo Yee gys Nathan, gra, 4Immee, as insh da David my harvaant, Myr shoh ta’n Chiarn dy ghra, Cha nee uss nee thie y hroggal dooys dy chummal ayn. 5Son cha vel mee er chummal ayns thie er-dyn laa hug mee lhiam seose Israel, derrey’n laa jiu; agh ta mee er ve scughey veih boayl dy boayl, as veih cabbane dy cabbane. 6Raad erbee, dy vel mee er n’gholl marish ooilley Israel, loayr mee rieau fockle rish veg jeh briwnyn Israel, (daue hug mee sarey dy reill my phobble) gra, Cre’n-fa nagh vel shiu er hroggal dou thie cedaragh? 7Nish er-y-fa shen, shoh myr jir oo rish my harvaant David, Myr shoh ta’n Chiarn dy heshaght-chaggee dy ghra, Ghow mee oo veih’n woaillee, veih bochillagh ny kirree, dy voddagh oo reill harrish my phobble Israel: 8As ta mee er ve mayrt raad erbee dy vel oo er hooyl, as er yiarey jeh ooilley dty noidyn veih kiongoyrt rhyt, as er choyrt ennym dhyt, corrym rish ennym ny deiney mooarey ta er y theihll. 9Neem’s ynnyd myrgeddin y phointeil da my phobble Israel, as ad y hoiaghey dy shickyr, as nee ad cummal ayns yn ynnyd oc hene, as cha bee ad er nyn scughey arragh; chamoo nee cloan ny mee-chrauee tranlaase orroo, ny smoo: (myr ec y toshiaght, 10As er-dyn traa doardee mee briwnyn dy ve harrish my phobble Israel): neem’s myrgeddin ooilley dty noidyn y choyrt fo-chosh. Ta mee ginsh dhyt ny-sodjey, dy jean y Chiarn thie y hroggal dhyt.

11As hig eh gy-kione, tra, vees jerrey er dty laghyn, as dy bee oo er dty haglym gys dty ayraghyn, dy drog-ym seose dty luight dty yeï, hig jeh dty vec; as neem’s y reeriaght echeysyn y hickyraghey. 12Eshyn nee thie y hroggal dooys, as neem’s y stoyl-reeoil echey y niartaghey son dy bragh. 13Beem’s ayr dasyn, as bee eshyn mac dooys: as cha goym my vyghin ersooyl veih, myr ghow mee eh veihsyn va royd. 14Agh neem’s eshyn y hoiaghey ayns my hie, as ayns my reeriaght son dy bragh: as bee’n stoyl-reeoil echey er ny niartaghey son dy bragh as dy bragh. 15Cordail rish ooilley ny goan shoh, as cordail rish ooilley’n ashlish shoh, shoh myr loayr Nathan rish David.

16As haink David y ree, as hoie eh kiongoyrt rish y Chiarn, as dooyrt eh, Quoi mish, O Hiarn Yee, as cre ta my hie, dy vel oo er n’yannoo wheesh er my hon? 17As foast myr nagh beagh shoh agh red fardalagh ayns dty hooillyn, O Yee, t’ou ny-sodjey er loayrt jeh thie dty harvaant son earishyn foddey ry-heet as er my hroggal seose gys y stayd ooasle shoh, O Hiarn Yee. 18Cre smoo oddys David y yeearree jeed’s, son onnor dty harvaant? son shione dhyt cree dty harvaant. 19O Hiarn, er graih dty harvaant, as cordail rish dty chree hene t’ou uss er n’yannoo ooilley’n obbyr ooasle shoh, ayns soilshaghey ooilley ny reddyn yindyssagh shoh. 20O Hiarn, cha vel unnane casley rhyt, chamoo ta Jee erbee agh uss, cordail rish ooilley ny ta shin er chlashtyn lesh nyn gleayshyn. 21As cre’n un ashoon er yn ooir, ta goll-rish dty phobble Israel, hie Jee dy eaysley son e phobble hene, dy yannoo dhyt hene ennym mooar as atchimagh, liorish geiyrt magh ashoonyn veih kiongoyrt rish dty phobble t’ou er livrey veih cheer Egypt? 22Son t’ou er n’ghoaill dty phobble Israel dy ve pobble dhyt hene son dy bragh; as haink uss Hiarn, dy ve nyn Yee. 23Nish er-y-fa shen, Hiarn, lhig da shen ny t’ou er loayrt mychione dty harvaant, as mychione e hie, ve er ny hickyraghey son dy bragh, as jean myr t’ou er ghra. 24Lhig da eer v’er ny hickyraghey, dy vod dt’ennym v’er ny ghloyraghey son dy bragh, gra, Yn Chiarn dy heshaght-flaunyss ta Jee Israel, eer Jee da Israel: as lhig da thie Ghavid dty harvaant v’er ny hickyraghey kiongoyrt rhyt. 25Son t’ou uss, O my Yee, er hoilshaghey da dty harvaant, dy jean oo thie y hroggal da: shen-y-fa, ta dty harvaant er ghoaill er dy yannoo’n phadjer shoh kiongoyrt rhyt. 26As nish, Hiarn, (uss y Jee, t’er yialdyn y foayr shoh da dty harvaant) 27Nish, dy gooidsave lhiat eisht dy vannaghey thie dty harvaant, dy vod eh ve kiongoyrt rhyt son dy bragh: son cre-erbee t’ou uss dy vannaghey, O Hiarn, bee eh bannit son dy bragh.