CAB. XVIII

1Nish lurg shoh, haink eh gy-kione dy woaill David ny Philistinee, as hug eh ad fo-chosh, as ghow eh Gath as e baljyn ass laue ny Philistinee: 2As woaill eh Moab; as haink ny Moabiteyn dy ve fo reill Ghavid, as v’ad fo keesh.

3As woaill David Hadarezer ree Zobah, ec Hamath, myr hie eh dy yannoo mie e reeriaght liorish awin Euphrates. 4As ghow David veihsyn thousane fainagh, as shiaght thousane markee, as feed thousane coshee, as yiare David feh-yskid ooilley ny cabbil fainee, er-lhimmey jeh keead, dreill eh da hene. 5As tra haink Syrianee Ghamascus dy chooney lesh Hadarezer, ree Zobah, varr David jeh ny Syrianee daa housane as feed dy gheiney. 6Eisht hug David garrisonyn ayns Syria Damascus; as haink ny Syrianee dy ve fo reill Ghavid, as v’ad fo keesh. Shoh myr ren y Chiarn David y choadey raad erbee dy jagh eh. 7As ghow David ny scapeyn airh, v’er sharvaantyn Hadarezer, as hug eh lesh ad gys Jerusalem. 8Myrgeddin veih Tibhath, as veih Chun, ard-valjyn Hadarezer, ghow David palchey erskyn towse dy phrash, lesh ren Solomon yn faarkey prashey, as ny pillaryn, as ny siyn prashey.

9Nish tra va Tou, ree Hamath, er chlashtyn dy row David er woalley ooilley sheshaght-caggee Hadarezer, ree Zobah, 10Hug eh Hadoram e vac gys ree David lesh bea as slaynt huggey, as dy ghoaill boggey mârish, son dy row eh er chaggey noi Hadarezer, as er woalley eh, (son va Hadarezer er chaggey rish Tou) as er ghoaill veih dy chooilley horch dy hiyn airh, as argid, as prash.

11Ad shen myrgeddin ren David y chasherickey da’n Chiarn, marish yn argid as yn airh, hug eh lesh veih ooilley ny ashoonyn shoh; veih Edom, as veih Moab, as veih cloan Ammon, as veih ny Philistinee, as veih Amalek. 12As ren Abishai mac Zeruiah stroie jeh ny Edomiteyn ayns coan y tollan hoght thousane jeig.

13As hug eh garrisonyn ayns Edom; as haink ooilley ny Edomiteyn dy ve fo reill Ghavid. Myr shoh ren y Chiarn David y choadey raad erbee dy jagh eh.

14Myr shoh ren David reill harrish ooilley Israel, rheynn briwnys as cairys kiart, er ooilley e phobble. 15As Joab, mac Zeruiah, va harrish y cheshaght-chaggee; as Jehoshaphat, mac Ahilud, cleragh ny lioaryn. 16As Zadok, mac Ahitub, as Ahimelech mac Abiathar, va ny saggyrtyn; as Shavsha yn scrudeyr. 17As Benaiah, mac Jehoiada va harrish ny Cherethiteyn, as ny Pelethiteyn; as mec Ghavid va ny ard-gheiney mygeayrt y ree.