CAB. XIX

1Nish haink eh gy-kione lurg shoh, dy dooar Nahash ree cloan Ammon baase, as ren e vac reill ny ynnyd. 2As dooyrt David, Neem’s m’aigney-mie y hoilshaghey da Hanun, mac Nahash, er-yn-oyr dy yeeagh e ayr kenjallys dooys. As hug David chaghteryn dy gherjaghey eh son baase e ayrey: eisht haink sharvaantyn Ghavid gys cheer cloan Ammon gys Hanun, dy gherjaghey eh. 3Agh dooyrt princeyn cloan Ammon rish Hanun, Vel uss smooinaghtyn dy vel David kiarail onnor da dty ayr ayns coyrt fir-gherjee hood? nagh nee son dy ronsaghey, ry-hoi stroie, as dy scrial magh y cheer ta e haghteryn er jeet? 4Shen-y-fa ghow Hanun chaghteryn Ghavid, as ren eh baarey ny faasaagyn jeu, as yiare eh ny garmadyn jeu ayns y vean kiart rish nyn gurpyn, as hug eh ad ersooyl. 5Eisht ve er ny insh da David, kys va ny deiney shirveishit: as chur eh chaghteryn ny whail oc; (son va lane nearey er ny deiney). As dooyrt y ree, Fuirree-jee ec Jericho derrey vees ny faasaagyn eu er n’aase, as eisht tar-jee hym’s.

6As tra dennee cloan Ammon dy row ad dy mooar er vrasnaghey David, hug Hanun as cloan Ammon thousane talent dy argid dy ailley daue fainee as markee veih Mesopotamia, as veih Syria-maachah, as veih Zobah. 7Myr shen daill ad daa housane jeig as feed dy gheiney, marish fainee, as ree Maachah as e phobble, haink as ren campal roish Medeba. As haggil cloan Ammon ad-hene cooidjagh veih nyn ard-valjyn, as ghow ad y magher-caggee. 8As tra cheayll David jeh, hug eh magh Joab, as ooilley ny deiney niartal caggee mârish. 9As haink cloan Ammon magh, as hayrn ad seose ayns order-caggee kiongoyrt rish giat yn ard-valley: as va ny reeaghyn haink dy chooney lhieu, er-lheh orroo hene ’sy vagher. 10Nish tra honnick Joab dy row’n caggey n’oï, roish as ny yeï, hayrn eh magh ooilley reih deiney Israel, as hug eh ad ayns order-caggee noi ny Syrianee. 11As y chooid elley jeh’n pobble, hug eh fo currym Abishai e vraar, dy chur eddin da cloan Ammon. 12As dooyrt eh, My ta ny Syrianee ro lajer er my hon, eisht nee uss cooney lhiam’s; agh my ta cloan Ammon ro lajer er dty hon’s, eisht neem’s cooney lhiat’s. 13Bee jeh cree mie, as lhig dooin caggey myr deiney dunnal, son y pobble ain, as son ard-valjyn nyn Yee: as lhig da’n Chiarn jannoo shen ny ta mie ayns e hilley. 14Myr shen hayrn Joab as y pobble va mârish, er-gerrey dy chaggey noi ny Syrianee, as roie ad er-chea kiongoyrt rish. 15As tra honnick cloan Ammon dy row ny Syrianee er choyrt cooyl, hyndaa adsyn myrgeddin roish Abishai e vraar, as hie ad stiagh gys yn ard-valley. Eisht haink Joab gys Jerusalem.

16As tra honnick ny Syrianee dy dug Israel y chooid smessey daue, hug ad chaghteryn, as hayrn ad magh ny Syrianee va cheu elley jeh’n awin: as va Shophach, captan sheshaght-caggee Hadarezer, er y chione oc. 17As ve inshit da David: as haggil eh ooilley Israel, as hie eh harrish Jordan, as haink eh orroo, as hug eh yn cheshaght ayns order-caggee nyn ’oï, as tra va David er n’yannoo shoh, ren ny Syrianee caggey rish. 18Agh roie ny Syrianee er-chea roish Israel; as varr David jeh ny Syrianee shiaght thousaneyn dy gheiney fainagh, as da-eed thousane coshee, as varr eh Shophach captan y cheshaght-chaggee. 19As tra honnick deiney Hadarezer, dy row’n varriaght ec Israel, ren ad shee rish David, as haink ad dy ve fo e reill: chamoo by-loys da ny Syrianee dy chooney lesh cloan Ammon ny sodjey.