CAB. XX

1As haink eh gy-kione, ec toshiaght ny bleeaney, mysh y traa ta reeaghyn cliaghtey dy gholl magh gys caggey, dy ren Joab leeideil magh ny reih deiney caggee, as ren eh spooilley cheer cloan Ammon, as haink eh, as ren eh soiaghey er Rabbah (agh duirree David ec Jerusalem) as woaill Joab Rabbah, as stroie eh eh. 2As ghow David crown y ree oc jeh e chione, as hooar eh dy beeagh eh talent dy airh, as va claghyn costal ayn; as ve soit er kione Ghavid: hug eh lesh myrgeddin niart spooilley ass yn ard-valley. 3As chur eh lesh magh y pobble v’ayn, as hug eh ad dy obbraghey dy creoi lesh saaueyn, as lesh cleïn yiarn, as lesh teighyn: er yn eer aght shoh ren David rish ooilley ny ard-valjyn cloan Ammon. As hyndaa David as ooilley’n pobble gys Jerusalem.

4As haink eh gy-kione ny lurg shoh, dy vrish caggey magh ec Gezer rish ny Philistinee, ec y traa shen varr Sibbechai yn Hushathite Sippai, va jeh cloan ny foawir, as v’ad er nyn goyrt fo-chosh. 5As va caggey reesht rish ny Philistinee; as varr Elhanan mac Jair Lahmi braar Gholiath yn Gittite, cass y shleiy echey va goll-rish garmin fidderagh. 6As va caggey reesht ec Gath, raad va dooinney dy yrjid vooar, va ny meïr as ny ordaagyn echey kiare as feed, shey er dagh laue, as shey er dagh cass; as v’eshyn mac da’n foawr. 7Agh tra hug eh yn-lane fo Israel, ren Jonathan mac Shimea, braar Ghavid y varroo eh. 8V’ad shoh ruggit da’n foawr ayns Gath: as huitt ad liorish laue Ghavid, as liorish laue e gheiney.