CAB. XXI

1As hass Satan seose noi cloan Israel, as chleaynee eh David dy ghoaill yn earroo oc, 2As dooyrt David rish Joab, as rish fir-reill y phobble, Immee-jee, as gow-jee coontey cloan Israel veih Beer-sheba eer gys Dan; as cur-jee lhieu yn coontey oc hym’s, dy vod fys ’ve aym er. 3As dreggyr Joab, Dy jean y Chiarn bishaghey yn pobble keead keayrt wheesh as t’ad: agh my hiarn as ree, nagh vel ad ooilley sharvaantyn my hiarn? cre’n-fa eisht ta my hiarn shirrey’n red shoh? cre’n-fa vees eh oyr dy hayrn loght er Israel? 4Ny-yeih, ghow goan y ree raad noi Joab: shen-y-fa jimmee Joab roish, as hie eh trooid ooilley Israel, as haink eh gys Jerusalem.

5As hug Joab stiagh slane coontey’n phobble da David. As ooilley adsyn jeh Israel v’ad, milley as keead thousane dy gheiney va son tayrn y cliwe: as va Judah kiare cheead three-feed as jeih thousaneyn, va son tayrn y cliwe. 6Agh Levi as Benjamin cha ren eh coontey ny-vud oc: son va sarey’n ree dy trome noi aigney Yoab. 7As kyndagh rish yn obbyr shoh va Jee er ny vrasnaghey; shen-y-fa woaill eh Israel. 8As dooyrt David rish Jee, S’mooar ta my loght, son shen ta mee er n’yannoo: agh nish guee-ym ort, gow ersooyl peccah dty harvaant, son ta mee er n’yannoo dy feer neu-hushtagh.

9As loayr y Chiarn rish Gad, phadeyr Ghavid, gra, 10Immee, as insh da David, Myr shoh ta’n Chiarn dy ghra, Ta mee cur dhyt three chebbyn, gow dty reih jeu, dooys dy chooilleeney ort. 11Myr shen haink Gad gys David, as dooyrt eh rish, Myr shoh ta’n Chiarn dy ghra; Gow dty reih, 12Edyr three bleeaney dy ghortey, er-nonney son three meeaghyn dy ve stroit roish dty noidyn, (choud’s nee cliwe dty noid berraghtyn ort) er-nonney dy ve son three laa fo cliwe y Chiarn, eer y chramp ayns y cheer, as ainle y Chiarn stroie trooid magh ooilley ardjyn Israel. Nish er-y-fa shen, bee ec dty choyrle, cre’n ansoor ver-ym lhiam huggeysyn, ta dy my choyrt er y chaghteraght. 13As dooyrt David rish Gad, Ta mee ayns chennid vooar: lhig dou nish tuittym fo laue’n Chiarn, (son s’mooar ta e vyghinyn) agh ny lhig dou tuittym ayns laue dooinney.

14Myr shen hug y Chiarn y chramp er Israel: as huitt jeh Israel three-feed as jeih thousaneyn. 15As hug Jee e ainle gys Jerusalem dy stroie eh; as myr v’eh stroie, chur y Chiarn my-ner, as ghow eh chymmey jeh’n stayd treih oc, as dooyrt eh rish yn ainle va stroie, S’lioar eh, tayrn back dty laue. As hass ainle y Chiarn liorish laare-vooie Ornan yn Jebusite. 16As hrog David e hooillyn, as honnick eh ainle y Chiarn ny hassoo eddyr niau as y thalloo, lesh cliwe loamrit ny laue sheeynt magh harrish Jerusalem: eisht huitt David as shanstyr Israel, va coamrit ayns aanrit-sack, er nyn eddin. 17As dooyrt David rish Jee, Nagh nee mish hug sarey dy ghoaill earroo’n phobble? mish hene t’er n’yannoo’n peccah, as yn olk shoh; agh er son ny kirree shoh, cre t’adsyn er n’yannoo? lhig da dty laue, guee-ym ort, O Hiarn my Yee, ve orrym’s, as er thie m’ayrey; agh cha nee er dty phobble, dy beagh adsyn er nyn gerraghey.

18Eisht doardee ainle y Chiarn Gad dy ghra rish David, dasyn dy gholl seose, as altar y hroggal gys y Chiarn, ayns laare-vooie Ornan yn Jebusite. 19As hie David seose er raa Ghad, loayr eh ayns ennym y Chiarn. 20As hyndaa Ornan back, as honnick eh yn ainle, as dollee eh eh-hene as ny kiare mec echey mârish. Nish va Ornan bwoalley curnaght. 21As myr va David cheet quail Ornan, yeeagh Ornan as honnick eh David, as hie eh magh veih’n laare-vooie, as chroym eh eh-hene gys David lesh e eddin gys y thalloo. 22Eisht dooyrt David rish Ornan, Cur dou grunt y laare-vooie shoh, dy voddym altar y hroggal er, gys y Chiarn: ver oo dou eh ec y slane price, dy vod y chramp v’er ny lhiettal veih’n pobble. 23As dooyrt Ornan rish David, Lhiat’s eh, as lhig da my hiarn y ree jannoo shen ny ta mie ayns e hilley: cur-my-ner ta mee cur dhyt myrgeddin dew son ourallyn-losht, as ny greïnyn-bwoallee son fuygh, as curnaght son oural-arran: ta mee stowal y slane. 24As dooyrt ree David rish Ornan, Nay; agh son shickyrys kionnee-yms eh ec y slane price: son cha goym shen ny ta lhiat’s da’n Chiarn, ny oural-losht y hebbal nastee. 25Myr shen hug David da Ornan son y ghrunt, shey cheead shekel dy airh ayns trimmid. 26As hrog David ayns shen altar gys y Chiarn, as heb eh ourallyn-losht, as ourallyn-shee, as deïe eh er y Chiarn; as dreggyr eh eh veih niau, liorish aile er altar yn oural-losht. 27As hug y Chiarn yn ainle fo harey; as hug eh seose e chliwe reesht ayns y fine.

28As ec y traa cheddin, tra honnick David dy ren y Chiarn freggyrt eh ayns laare-arroo Ornan y Jebusite; eisht heb eh oural ayns shen. 29(Son va cabbane-agglish y Chiarn va Moses er n’yannoo ayns yn aasagh, as altar yn oural-losht, ec y traa shen, ayns yn ard-ynnyd ec Gibeon. 30Agh cha by-loys da David goll kiongoyrt rish dy gheddyn coyrle veih Jee: son va aggle er kyndagh rish cliwe ainle y Chiarn).