CAB. XXIV

1Nish shoh myr ta mec Aaron er nyn rheynn. Mec Aaron, Nadab, Abihu, Eleazar, as Ithamar. 2Agh hooar Nadab as Abihu baase roish nyn ayr, as cha row cloan oc: shen-y-fa ren Eleazar as Ithamar cooilleeney oik yn ard-saggyrt. 3As ren David ad y rheynn, chammah Zadok jeh mec Eleazar, as Ahimelech jeh mec Ithamar, cordail rish nyn oik ayns y chirveish oc. 4As va ny shlee dy ard-gheiney ry-gheddyn jeh mec Eleazar na jeh mec Ithamar; as myr shoh v’ad er nyn rheynn. Mastey mec Eleazar va shey-jeig dy ard-gheiney jeh thie nyn ayraghyn, as hoght mastey mec Ithamar, cordail rish thie nyn ayraghyn. 5Myr shoh v’ad chammah’n derrey yeh as y jeh elley er nyn rheynn liorish nyn gronney; son va kiannoortyn y chiamble casherick, as kiannoortyn thie Yee, jeh mec Eleazar, as jeh mec Ithamar. 6As she Shemaiah mac Nethaneel yn scrudeyr, fer jeh ny Leviteyn, ghow sheese nyn enmyn kiongoyrt rish y ree, as ny princeyn, as Zadok yn ard-saggyrt, as Ahimelech mac Abiathar, as kiongoyrt rish ny ard-gheiney ayraghyn ny saggyrtyn as ny Leviteyn: un ard lught-thie goit son Eleazar, as ard lught-thie elley son Ithamar. 7Nish haink y chied lot magh er Jehoiarib, yn nah lot er Jedaiah, 8Yn trass er Harim, yn chiarroo er Seorim, 9Yn wheiggoo er Malchijah, yn cheyoo er Mijamin, 10Yn chiaghtoo er Hakkoz, yn hoghtoo er Abijah, 11Yn nuyoo er Jeshua, yn jeihoo er Shecaniah, 12Yn un lot yeig er Eliashib, yn nah lot yeig er Jakim, 13Yn trass yeig er Huppah, yn chiarroo yeig er Jeshebeab, 14Yn wheiggoo-yeig er Bilgah; yn cheyoo yeig er Immer, 15Yn chiaghtoo yeig er Hezir, yn hoghtoo yeig er Aphses, 16Yn nuyoo yeig er Pethahiah, yn eedoo da Jehezekel, 17Yn chied lot as feed er Jachin, yn nah lot as feed er Gamul, 18Yn trass lot as feed er Delaiah, yn chiarroo lot as feed er Maaziah. 19Shoh myr va’n chirveish er ny oardrail dy heet stiagh gys thie’n Chiarn, cordail rish nyn goorse, fo Aaron nyn shenn-ayr, myr va’n Chiarn Jee Israel er harey da.

20As y chooid elley jeh mec Levi v’ad shoh: jeh mec Amram, Shubael: jeh mec Shubael, Jehdeiah. 21Mychione Rehabiah: jeh mec Rehabiah, yn chied er va Ishiah. 22Jeh ny Izhariteyn, Shelomoth: jeh mec Shelomoth, Jahath. 23As mec Hebron, Jeriah yn chied er, Amariah yn nah er, Jahaziel yn trass er, Jekameam yn chiarroo. 24Jeh mec Uzziel, Michah: jeh mec Michah, Shamir. 25Braar Michah va Ishiah: jeh mec Ishiah, Zechariah. 26Mec Merari va Mahli as Mushi: mec Jaaziah, Beno.

27Mec Merari rish Jaaziah, Beno, as Shoham, as Zaccur, as Ibri. 28Jeh Mahli haink Eleazar, echey cha row mec. 29Mychione Kish: mac Kish va Jerahmeel. 30Mec Mushi myrgeddin, Mahli as Eder, as Jerimoth. Ad shoh va mec ny Leviteyn, rere thie nyn ayraghyn. 31Hayrn ad shoh lottyn myrgeddin myr ren nyn mraaraghyn mec Aaron, fenish Ghavid y ree, as Zadok, as Ahimelech, as ard-gheiney ayraghyn ny saggyrtyn as ny Leviteyn, eer ny ard-ayraghyn myr ren nyn mraaraghyn saa.