CAB. XXVI

1Mychione gard ny giattyn: jeh ny Korhiteyn va Meshelemiah mac Kore, jeh mec Asaph. 2As mec Meshelemiah v’ad Zechariah yn mac shinney, Jediael yn nah, Zebadiah yn trass, Jathniel yn chiarroo, 3Elam yn wheiggoo, Jehohanan yn cheyoo, Elioenai yn chiaghtoo. 4As mec Obed-edom v’ad, Shemaiah yn mac shinney, Jehozabad yn nah, Joah yn trass, as Sacar yn chiarroo, as Nethaneel yn wheiggoo, 5Ammiel y cheyoo, Issachar yn chiaghtoo, Peulthai yn hoghtoo: son va Jee er vannaghey eh. 6Da Shemaiah e vac myrgeddin va ruggit mec, va reill ayns thie nyn ayrey: son v’ad deiney niartal as dunnal. 7Mec Shemaiah, Othni, as Rephael, as Obed, Elzabad, ny braaraghyn oc va deiney trean; Elihu as Semachiah. 8Ad shoh ooilley, jeh mec Obed-edom: ad-hene, nyn mec, as nyn mraaraghyn, deiney fondagh, niartal son y chirveish, v’ad three-feed as jees, jeh Obed-edom. 9As va ec Meshelemiah mec as braaraghyn, deiney lajer, hoght-jeig. 10Va ec Hosah, jeh cloan Merari, mec; Simri yn ard-er, (son ga nagh row eh yn mac shinney, ny-yeih ren e ayr eh yn ard-er;) 11Hilkiah yn nah er, Tebaliah yn trass, Zechariah yn chiarroo: va ooilley mec as braaraghyn Hosah three-jeig. 12Nyn mast’ oc shoh va gard ny giattyn er nyn rheynn, eer mastey ny ard-gheiney, freaylley gard noi-ry-hoi, dy hirveish ayns thie’n Chiarn.

13As hilg ad lottyn chammah son beg as mooar, rere thie nyn ayraghyn, son dagh giat. 14As son y cheu har, huitt y cronney gys Shelemiah; eisht gys Zechariah e vac (dooinney creeney lowal) hilg ad lottyn, as huitt y cronney echeysyn my-hwoaie. 15Gys Obed-edom my-yiass; as gys e vec, thie Asuppim. 16Gys Shuppim as Hosah, haink y cronney magh er y cheu-heear, lesh y yiat Shallecheth, rish y phavement ard, gard noi gard, er dagh cheu jeh’n chiamble. 17Er y cheu har, va shey Leviteyn, er y cheu-twoaie kiare ’sy laa, er y cheu jiass kiare ’sy laa, as gys Asuppim jees as jees. 18Ec Parbar ec y cheu-heear, kiare ec y phavement ard, as jees ec Parbar. 19Shoh myr va ny gardyn er nyn rheynn mastey mec Kore, as mastey mec Merari.

20As jeh ny Leviteyn, Ahijah va harrish tashtaghyn thie Yee, as harrish tashtaghyn y chooid chasherick. 21Mychione mec Laadan; jeh mec Laadan yn Gershonite, ard-gheiney jeh thie Laadan y Gershonite, va Jehiel, as e vec. 22Agh va Jehiel, Zetham, as Joel, e vraaraghyn soit harrish tashtaghyn thie’n Chiarn. 23Jeh ny Amramiteyn, as ny Izhariteyn, ny Hebroniteyn, as ny Uzzieliteyn: 24As er Shebuel mac Ghershom, mac Voses, va ard churrym ny tashtaghyn. 25As e vraaraghyn liorish Eliezer; Rehabiah e vac-syn, as Jeshaiah e vac-syn, as Joram e vac-syn, as Zichri e vac-syn, as Shelomith e vac-syn: 26Shelomith cheddin as e vraaraghyn, va harrish ooilley tashtaghyn y chooid chasherick, va David y ree, as ny ard ayraghyn, ny captanyn harrish thousaneyn as keeadyn, as captanyn ny sheshaghtyn-caggee er chasherickey. 27Jeh’n spooilley chossyn ad ayns caggey, ren ad ayrn y chasherickey, dy choamrey thie’n Chiarn. 28As ooilley ny va Samuel y phadeyr, as Saul mac Kish, as Abner mac Ner, as Joab mac Zeruiah er chasherickey; as quoi-erbee va er chasherickey nhee erbee, ve fo currym Shelomith, as e vraaraghyn.

29Jeh ny Izhariteyn, va Chenaniah, as e vec, son offishearyn as briwnyn ayns cooishyn elley harrish Israel. 30As jeh ny Hebroniteyn, Hashabiah as e vraaraghyn, deiney dunnal, thousane as shiaght cheead, va nyn vir-oik harrish Israel cheu shoh dy Yordan lesh y sheear, ayns ooilley cooishyn y Chiarn, as ayns shirveish y ree, 31Mastey ny Hebroniteyn, eer ny Hebroniteyn hene, va Jerijah yn ard-er, rere kynneeyn e ayraghyn. Ayns y da-eedoo vleïn jeh reill Ghavid, va coontey er ny ghoaill jeu, as va ry-gheddyn nyn mast’ deiney dunnal as niartal, ec Jazer Ghilead. 32As e vraaraghyn, deiney niartal, v’ad daa housane as shiaght cheead, ard ayraghyn, ad va ree David er n’yannoo fir-reill harrish ny Reubeniteyn, ny Gaditeyn, as lieh-tribe Vanasseh, son dy chooilley chooish va bentyn gys Jee, as cooishyn y ree.