CAB. XXVII

1Nish cloan Israel lurg nyn earroo, ta shen, ny ard ayraghyn, as captanyn thousaneyn, as keeadyn, as ny fir-oik oc va shirveish y ree ayns nyn goorseyn, hie magh as stiagh shirveish, mee as mee, car ny bleeaney, jeh dagh coorse va kiare thousaneyn as feed. 2Harrish y chied choorse son y chied vee, va Jashobeam mac Zabdiel: as y choorse echeysyn va kiare thousaneyn as feed. 3Jeh cloan Perez, yn ard-er jeh ooilley ny captanyn y cheshaght son y chied vee. 4As harrish coorse y nah vee, va Dodai yn Ahohite, as jeh’n choorse echeysyn va Mikloth myrgeddin yn ard-chaptan: ayns y choorse echeysyn neesht va kiare thousaneyn as feed. 5Yn trass chaptan jeh’n cheshaght son y trass vee, va Benaiah, mac Jehoiada, ard leeideilagh: ayns y choorse echeysyn va kiare thousaneyn as feed. 6Shoh’n Benaiah cheddin va ny ard-er, as erskyn ny jeih as feed, as ayns y choorse echeysyn va Ammizabad e vac. 7Yn chiarroo chaptan son y chiarroo vee, va Asahel braar Yoab, as Zebadiah e vac by-niessey da: as ayns y choorse echeysyn va kiare thousaneyn as feed. 8Yn wheiggoo chaptan son y wheiggoo vee, va Shamhuth yn Izrahite: as ayns e choorse va kiare thousaneyn as feed. 9Yn cheyoo chaptan son y cheyoo vee, Ira mac Ikkesh, yn Tekoite: as ayns e choorse va kiare thousaneyn as feed. 10Yn chiaghtoo chaptan son y chiaghtoo vee va, Helez yn Pelonite, jeh cloan Ephraim: as ayns y choorse echeysyn va kiare thousaneyn as feed. 11Yn hoghtoo chaptan son yn hoghtoo vee va, Sibbecai yn Hushathite, jeh ny Zarhiteyn; as ayns e choorse va kiare thousaneyn as feed. 12Yn nuyoo chaptan son yn nuyoo vee, va Abiezer yn Anetothite jeh ny Benjamiteyn; as ayns e choorse va kiare thousaneyn as feed. 13Yn jeihoo chaptan son y jeihoo vee, va Maharai yn Netophathite, jeh ny Zarhiteyn: ayns e choorse va kiare thousaneyn as feed. 14Yn un chaptan yeig son yn un vee yeig va Benaiah yn Pirathonite, jeh cloan Ephraim: as ayns e choorse va kiare thousaneyn as feed. 15Yn nah chaptan yeig son y nah vee yeig, va Heldai yn Netophathite, jeh Othniel: as ayns e choorse va kiare thousaneyn as feed.

16Myrgeddin harrish tribeyn Israel: fir-reill ny Reubeniteyn, va Eliezer mac Zichri: jeh ny Simeoniteyn, Shephatiah mac Maachah: 17Jeh ny Leviteyn, Hashabiah mac Kemuel; jeh ny Aaroniteyn, Zadok: 18Jeh Judah, Elihu fer jeh braaraghyn Ghavid: jeh Issachar, Omri mac Michael: 19Jeh Zebulun, Ishmaiah mac Obadiah: jeh Naphtali, Jerimoth mac Azriel: 20Jeh cloan Ephraim, Hosea mac Azaziah: jeh lieh-tribe Vanasseh, Joel mac Pedaiah: 21Jeh lieh-tribe Vanasseh ayns Gilead, Iddo mac Zechariah: jeh Benjamin, Jaasiel mac Abner: 22Jeh Dan, Azareel mac Jeroham. Ad shoh va princeyn harrish tribeyn Israel.

23Agh cha ghow David yn earroo oc veih feed bleïn dy eash as fo: er-yn-oyr dy row’n Chiarn er ghra, dy jinnagh eh Israel y vishaghey myr rollageyn yn aer. 24Ren Joab mac Zeruiah toshiaght dy ghoaill yn earroo oc, agh cha jagh eh trooid lesh, er-yn-oyr kyndagh rish shoh dy huitt jymmoose er Israel; chamoo va’n earroo er ny choyrt ayns coontey recortyssyn ree Ghavid.

25As harrish tashtaghyn y ree va Azmaveth mac Adiel; as harrish ny thieyn-stoyr ayns ny magheryn, ayns ny ard-valjyn, as ny baljyn-cheerey, as ayns ny cashtallyn, va Jehonathan mac Uzziah. 26As harroosyn va mysh obbyr magheragh, as messyn y thallooin, va Ezri, mac Chelub. 27As harrish ny garaghyn-feeyney va Shimei yn Ramathite; as harrish ny cellar-yn-feeyney ayns ny garaghyn, va Zabdi yn Shiphmite. 28As harrish ny biljyn-olive, as ny biljyn-figgagh v’ayns y thalloo injil, va Baal-hanan yn Gederite: as harrish ny cellaryn-ooil va Joash. 29As harrish y maase va goaill ayns Sharon va Shitrai yn Sharonite: as harrish y maase va goaill ayns ny coanyn, va Shaphat mac Adlai. 30Harrish ny camelyn neesht, va Obil yn Ishmaelite: as harrish ny assylyn, va Jehdeiah yn Meronothite. 31As harrish ny shioltaneyn, va Jaziz yn Hagerite. V’ad shoh ooilley nyn stiurtyn harrish cooid ree Ghavid. 32Va Jonathan, naim Ghavid neesht, ny er-coyrlee, dooinney creeney, as scrudeyr; as Jehiel mac Hachmoni, va fer-ynsee mec y ree. 33As Ahitophel va fer-coyrlee yn ree, as Hushai yn Archite va sheshey da’n ree. 34As lurg Ahitophel, va Jehoiada mac Benaiah, as Abiathar: as yn ard-chaptan er ooilley armee’n ree va Joab.