CAB. XXVIII

1As ren David sumney cooidjagh ooilley princeyn Israel, princeyn ny tribeyn, as captanyn ny sheshaghtyn va shirveish y ree ayns nyn goorse, as ny captanyn harrish thousaneyn, as captanyn harrish keeadyn, as ny stiurtyn harrish ooilley tashtaghyn as cooid y ree, as e vec, marish ny fir-oik, as ny ard-gheiney, as ny deiney dunnal caggee gys Jerusalem. 2Eisht hass David y ree seose, as dooyrt eh, Eaisht-jee rhym, my vraaraghyn, as my phobble, Er my hon’s, ve ayns my chree dy hroggal thie dy shickyr son arg conaant y Chiarn, as son stoyl-choshey nyn Yee, as ren mee kiarail ro-laue son yn obbyr: 3Agh dooyrt Jee rhym, Cha nee uss nee thie y hroggal son m’ennym’s, er-yn-oyr dy vel uss er ny ve dooinney caggee, as er gheayrtey fuill. 4Ny-yeih, ta’n Chiarn Jee Israel er my reih, roish ooilley thie m’ayrey, dy ve ree harrish Israel son earishyn liauyrey, son t’eh er reih Judah dy ve yn ard tribe; as jeh tribe Yudah, thie m’ayrey: as mastey mec m’ayrey ghow eh taitnys aynym’s, dy yannoo mee my ree harrish ooilley Israel: 5As jeh ooilley my vec (son ta’n Chiarn er choyrt dou ymmodee mec) t’eh er reih Solomon my vac, dy hoie er stoyl-reeoil reeriaght y Chiarn harrish Israel. 6As dooyrt eh rhym, Solomon dty vac, eshyn nee troggal my hie as my chooyrtyn: son ta mee er reih eh dy ve my vac, as beem’s ayr dasyn. 7As neem’s y reeriaght echeysyn y niartaghey son dy bragh, my nee eh tannaghtyn dy chooilleeney my annaghyn, as my vriwnyssyn, myr ec y laa jiu. 8Nish er-y-fa shen ayns shilley ooilley Israel as pobble y Chiarn, as ayns clashtyn y Jee ain, freill-jee as shir-jee lurg ooilley annaghyn y Chiarn y Jee eu: dy vod shiu freayll y cheer mie shoh ayns nyn gummal, as faagail eh son eiraght da nyn gloan nyn yeï son earishyn foddey beayn.

9As uss Solomon, my vac, toig aigney Yee dty ayrey, as jean eh y hirveish lesh cree firrinagh, as lesh aigney arryltagh: son ta’n Chiarn ronsaghey magh dy chooilley chree, as toiggal ooilley ny smooinaghtyn t’ayndoo. My t’ou dy hirrey eh, bee eh er ny gheddyn liort; agh my hreigys oo eh, nee eh dty hreigeil son dy bragh. 10Cur tastey nish; son ta’n Chiarn er reih oo dy hroggal thie son yn ynnyd casherick: bee creeoil, as jean eh. 11Eisht hug David da Solomon e vac pattern jeh porch y chiamble, as jeh ny shamyryn mygeayrt-y-mysh, as jeh ny thieyn-tashtee, as jeh ny shamyryn syrjey, as jeh ny parlaryn cheu-sthie, as jeh ynnyd y stoyl-myghin. 12As cummey jeh ooilley ny hug spyrryd Yee roish, jeh cooyrtyn thie’n Chiarn, as jeh ooilley ny shamyryn mygeayrt, jeh ny thieyn-tashtee casherick, as jeh thieyn-tashtee yn chooid chasherick: 13Myrgeddin son coorseyn ny saggyrtyn as ny Leviteyn, as son ooilley obbyr shirveish thie’n Chiarn, as son ooilley siyn y chirveish ayns thie’n Chiarn. 14Hug eh towse corrym dy airh, son dy chooilley nhee dy ve jeant lesh airh, son dagh jeshaght cour dy chooilley hirveish, argid myrgeddin son dy chooilley obbyr; argid ayns towse, son dy chooilley yeshaght cour dagh shirveish: 15Eer y towse kiart son ny kainlereyn airh, as son ny lampyn airh towse corrym son dagh kainlere, as son ny lampyn oc: as son ny kainlereyn argid, liorish towse chammah son ny kainlereyn, as myrgeddin son nyn lampyn, cordail rish ymmyd dagh kainlere. 16As liorish towse hug eh airh son buird yn arran casherick, son dagh boayrd, as myrgeddin argid son dagh boayrd argid. 17Airh ghlen myrgeddin son ny aalyn, as ny meilaghyn, as ny cappanyn: as son ny basonyn airh hug eh airh liorish towse son dagh bason, as myrgeddin argid liorish towse son dagh bason argid: 18As son altar yn incense, airh ghlen liorish towse; as airh son pattern jeh cummey ny cherubim, kys v’ad dy skeayley magh nyn skianyn, as dy choodaghey arg conaant y Chiarn. 19Ooilley shoh dooyrt David, ren y Chiarn soilshaghey dou ayns screeu lesh e laue mârym eer ooilley obbraghyn y pattern shoh. 20As dooyrt David rish Solomon e vac, Bee dunnal, as creeoil, as jean eh: ny bee fo aggle ny imnea; son bee’n Chiarn Jee, eer y Jee aym’s mayrt, cha jean eh failleil ny treigeil oo, agh ver oo kione er ooilley’n obbyr son shirveish thie’n Chiarn. 21As cur-my-ner, bee coorseyn ny saggyrtyn as ny Leviteyn mayrt son dy chooilley hirveish ayns thie Yee: as bee mayrt son dy chooilley horch dy obbyr, dy chooilley ghooinney schleioil as aggindagh, son dy chooilley horch dy hirveish: bee ny princeyn myrgeddin as ooilley’n pobble dy slane fo dty reill.