CAB. XXIX

1Eisht dooyrt David y ree rish ooilley’n cheshaght, Ta Solomon my vac, eh ynrycan ta Jee er reih, foast aeg as meiygh, as ta’n obbyr mooar: son cha vel y phlaase son dooinney, agh son y Chiarn Jee. 2Nish ta mee er hilgey ro-laue lesh ooilley my phooar gour thie my Yee, yn airh son ny siyn airhey, as yn argid son ny siyn argid, as y phrash son siyn prashey, yiarn son obbyr yiarn, fuygh son obbyr fuygh; claghyn-onyx, as claghyn costal dy ve soit, claghyn sollys, as jeh caghlaaghyn daah, as dy chooilley vonney dy chlaghyn costal, as claghyn-marble ayns palchey. 3As, er-yn-oyr dy vel mee er hoiaghey my ghraih er thie my Yee, ta aym jeh my chooid hene er-lheh, airh as argid, ta mee er stowal er thie my Yee, harrish as erskyn ooilley ny ta mee er chiarail ro-laue son y thie casherick. 4Eer three thousane talent dy airh, jeh airh Ophir, as shiaght thousane talent dy argid ghlen, dy choodaghey voallaghyn ny thieyn: 5Yn airh son obbyr airh, as yn argid son obbyr argid, as son dy chooilley vonney dy obbyr dy ve jeant liorish laueyn deiney schleioil. As quoi-erbee eisht ta aggindagh, lhig da nish lhieeney e laue dy hebbal gys shirveish y Chiarn.

6Eisht ren ny ard ayraghyn, as princeyn tribeyn Israel, as captanyn thousaneyn as keeadyn, marish ny oaseiryn harrish obbyr y ree, chebbal dy arryltagh, 7As hug ad son shirveish thie Yee queig thousane talent, as jeih thousane peesh dy airh; as jeih thousane talent dy argid; as jeh prash hoght thousane jeig dy halentyn; as keead thousane talent dy yiarn. 8As quoi-erbee va claghyn costal oc, hug ad lhieu ad gys tashtaghyn thie’n Chiarn, fo laue Jehiel yn Gershonite. 9Eisht va’n pobble ayns ard-voggey son feoiltys nyn jebballyn, er-yn-oyr lesh cree ynrick, dy ren ad chebbal dy arryltagh gys y Chiarn: as ghow David y ree myrgeddin boggey erskyn towse.

10Shen-y-fa ren David y Chiarn y vannaghey fenish ooilley’n cheshaght: as dooyrt David, Bannit dy row uss, Hiarn Yee Israel nyn ayr, son dy bragh as dy bragh. 11Lhiat’s, O Hiarn, ta’n vooadys, as y phooar, as y ghloyr, as y varriaght, as yn ooashley: son lhiat’s ta dy chooilley nhee ayns niau as er y thalloo: lhiat’s y reeriaght, O Hiarn, as uss ta erskyn-earroo ard harrish ooilley. 12Voïd’s ta chammah berchys as ooashley cheet, as t’ou reill harrish ooilley, as ayns dty laue ta pooar as troshid, as ayns dty laue te dy hoiaghey seose, as dy choyrt niart da ooilley. 13Nish er-y-fa shen, nyn Yee, ta shin cur booise dhyt, as ard-voylley da dt’ennym gloyroil. 14Agh quoi mish, as cre ta my phobble, dy vel fort ain dy hebbal lesh creeaghyn cha arryltagh er yn aght shoh? son voïd’s ta dy chooilley nhee, as jeh dty chooid hene, ta shin er jebbal dhyt’s. 15Son cha vel shin agh joarreeyn kiongoyrt rhyt, as troailtee myr va ooilley nyn ayraghyn; ta nyn laghyn er y thalloo myr scadoo, as cha vel tannaghtyn ayn. 16O Hiarn nyn Yee, ooilley’n stoyr shoh ta shin er gheddyn aarloo dy hroggal dhyt thie son dt’ennym casherick, veih dty laue te cheet, as te ooilley lhiat hene. 17Ta fys aym myrgeddin, my Yee, dy vel oo prowal yn cree, as dy vel taitnys ayd ’syn ynrickys. Er my hon’s ayns ynrickys my chree ta mee dy aggindagh er hebbal ooilley’n stoyr shoh: as nish lesh boggey ta mee er vakin dty phobble ta kionfenish ayns shoh, chebbal hood’s dy arryltagh. 18O Hiarn Yee Abraham, Isaac, as Israel, nyn ayraghyn, freill dy bragh yn aigney-mie shoh ayns smooinaghtyn creeaghyn dty phobble, as niartee nyn greeaghyn dy hirveish oo. 19As giall da Solomon my vac cree ynrick, dy reayll dty annaghyn, dty recortyssyn, as dty lattyssyn, as dy yannoo ooilley ny obbraghyn shoh, as dy hroggal y chiamble shen ny chour ta mee ro-laue er chiarail.

20As dooyrt David rish ooilley’n cheshaght, Nish bannee-jee’n Chiarn nyn Yee. As ren y slane sheshaght yn Chiarn Jee nyn ayraghyn y vannaghey, as chroym ad sheese nyn ghing, as hug ad ooashley da’n Chiarn, as y ree. 21As heb ad ourallyn gys y Chiarn, as ourallyn-losht er laa-ny-vairagh, eer thousane dow, as thousane rea, as thousane eayn, marish nyn ourallyn-feeyney as ourallyn elley ayns slane palchey, son ooilley Israel: 22As ren ad gee as giu fenish y Chiarn er y laa shen, lesh ard-ghennallys: as ren ad Solomon mac Ghavid ny ree yn nah cheayrt, as dooilee ad eh gys y Chiarn dy ve yn ard-reiltagh, as Zadok dy ve’n ard-saggyrt. 23Eisht hoie Solomon er stoyl-reeoil y Chiarn myr ree ayns ynnyd Ghavid e ayr, as v’eh er ny niartaghey, as hug ooilley Israel biallys da. 24As ren ooilley ny princeyn, as ny deiney pooaral, as ooilley mec ree Ghavid myrgeddin goaill-rish Solomon dy ve nyn ree. 25As ren y Chiarn Solomon y hoiaghey seose dy ard ayns sooillyn ooilley Israel, as stow eh er lheid y ooashley reeoil as nagh row ec ree erbee va roish ayns Israel.

26Shoh myr ren David mac Jesse reill harrish ooilley Israel. 27As y traa ren eh reill harrish Israel va da-eed bleïn; shiaght bleeaney reill eh ayns Hebron, as three bleeaney jeig as feed ayns Jerusalem. 28As hooar eh baase ayns shenn eash vie, bannit lesh laghyn liauyrey, berchys, as ooashley: as ren Solomon e vac reill ny ynnyd. 29Nish, obbraghyn Ghavid y ree, toshiaght as jerrey, cur-my-ner, t’ad scruit ayns lioar Samuel y fakyder, as ayns lioar Nathan y phadeyr, as ayns lioar Ghad y phadeyr. 30Mychione ooilley e reill, as e niart, as ny traaghyn hie harrishyn, as harrish Israel, as harrish ooilley reeriaghtyn ny cheeraghyn mygeayrt.