CAB. IV

1Mec Yudah; Pharez, Hezron, as Carmi, as Hur, as Shobal, 2As hooar Reaiah, mac Shobal, Jahath, as hooar Jahath Ahumai, as Lahad. Ad shoh kynneeyn ny Zorathiteyn. 3As v’ad shoh jeh sluight ayr Etam; Jezreel, as Ishma, as Idbash: as va ennym nyn shuyr Hazelelponi. 4As Penuel ayr Ghedor, as Ezer ayr Hushah, Ad shoh mec Hur, mac shinney Ephratah, ayr Beth-lehem.

5As v’ec Ashur, ayr Tekoa, daa ven, Helah, as Naarah. 6As dymmyrk Naarah da, Ahuzam, as Hepher, as Temeni, as Haahashtari. V’ad shoh mec Naarah. 7As va mec Helah, Zereth, as Jezoar, as Ethnan. 8As hooar Coz Anub, as Zobebah, as kynneeyn Aharhel, mac Harum.

9As va Jabez ny s’ooasle na e vraaraghyn: as denmys e voir eh Jabez, gra, Er-yn-oyr dy dymmyrk mee eh lesh trimshey. 10As deïe Jabez gys Jee Israel, gra, Oh dy jinnagh oo mish y vannaghey dy jarroo, as my ardjyn y heeyney magh, as dy bee dty laue mârym dy my reayll veih tranlaase, nagh bee’m seaghnit liorish. As hug Jee e yeearree da.

11As hooar Chelub, braar Shuah, Mehir, va ayr Eshton. 12As hooar Eshton Beth-rapha, as Paseah, as Tehinnah ayr Ir-nahash. T’ad shoh deiney Rechah. 13As mec Kenaz, Othniel, as Seraiah: as mac Othniel, Hathath. 14As hooar Meonothai Ophrah: as hooar Seraiah Joab, ayr chummaltee coan Charashim, son fir-cheirdee v’ad. 15As mec Chaleb, mac Jephunneh, Iru, Elah, as Naam: as mac Elah, Kenaz. 16As mec Jehalaleel, Ziph, as Ziphah, Tiria, as Asareel. 17As mec Ezra va, Jether, as Mered, as Epher, as Jalon: as dymmyrk ee Miriam, as Shammai, as Ishbah, ayr Eshtemoa. 18As dymmyrk y ven echey Jehudijah Jered ayr Ghedor, as Heber ayr Socho, as Jekuthiel ayr Zanoah. As ad shoh mec Bithiah, inneen da Pharaoh, ren Mered y ghoaill. 19As mec y ven echey Hodiah shuyr Naham, ayr Keilah yn Garmite, as Eshtemoa yn Maachathite. 20As mec Shimon v’ad, Ammon, as Rinnah, Ben-hanan, as Tilon. As mec Ishi v’ad, Zoheth, as Ben-zoheth.

21Mec Shelah, mac Yudah, v’ad, Er ayr Lecah as Laadah ayr Mareshah, as y sluight ocsyn va fee aanrit keyl, jeh thie Ashbea, 22As Jokim, as deiney Chozeba, as Joash, as Saraph, va reill ayns Moab, as Jashubi-lehem. As va shoh foddey er-dy-henney. 23V’ad shoh fir-chraie, as adsyn va cummal mastey ny garaghyn-feeyney, as magheryn: shen y raad va nyn gummal mysh obbyr y ree.

24Mec Simeon va, Nemuel, as Jamin, Jarib, Zerah, as Shaul: 25Shallum mac Shaul, Mibsam mac Shallum, Mishma mac Mibsam. 26As mec Mishma; Hamuel e vac, Zacchur e vac, Shimei e vac. 27As va shey mec jeig ec Shimei, as shey inneenyn; agh cha row cooid vooar dy chloan ec e vraaraghyn, chamoo ren ooilley’n sluight oc bishaghey, myr cloan Yudah. 28As ren ad cummal ec Beer-sheba, as Moladah, as Hazar-shual, 29As ec Bilhah, as ec Ezen, as ec Tolad, 30As ec Bethuel, as ec Hormah, as ec Ziklag, 31As ec Beth-marcaboth, as ec Hazar-susim, as ec Beth-birei, as ec Shaaraim: ad shoh va ny ard-valjyn oc rish lhing Ghavid. 32As va ny baljyn oc, Etam, as Ain, Rimmon, as Tochen, as Ashan, queig baljyn. 33As ooilley ny baljyn-beggey va mysh ny ard-valjyn cheddin, derrey Baal. Shoh nyn gummallyn, as shoh nyn sheelogheyn. 34As Meshobab, as Jamlech, as Joshah, mac Amaziah, 35As Joel, as Jehu mac Josibiah, mac Seraiah, mac Asiel, 36As Elioenai, as Jaakobah, as Jeshohaiah, as Asaiah, as Adiel, as Jesimiel, as Benaiah, 37As Ziza mac Shiphi, mac Allon, mac Jedaiah, mac Shimri, mac Shemaiah. 38V’ad shoh, ta nish enmyssit, princeyn mastey nyn sheelogheyn: as ren thie ny ayraghyn oc bishaghey dy mooar.

39As hie ad gys cagliagh Ghedor, eer gys cheu-har y choan, dy hirrey pastyr son nyn shioltaneyn. 40As hooar ad pastyr menoyr as mie, as va’n cheer lhean, as sauchey, as sheeoil: son va cloan Ham er vaghey ayns shen ry-foddey dy hraa. 41As haink ad shoh roïe enmyssit, rish lhing Hezekiah, ree Yudah, as ghow ad ny cabbaneyn oc, as ny cummallyn v’ayns shen, as stroie ad dy bollagh ad gys y laa jiu, as ren ad baghey ayns nyn ynnydyn: er-yn-oyr dy row pastyr ayns shen son nyn shioltaneyn. 42As hie sheshaght jeh mec Simeon, eer queig cheead dooinney gys cronk Seir fo leeideilagh nyn gaptanyn Pelatiah, as Neariah, as Rephaiah, as Uzziel mac Ishi. 43As stroie ad yn chooid elley jeh ny Amalekiteyn v’er scapail, as ren ad cummal ayns shen gys y laa t’ayn jiu.