CAB. V

1Nish mec Reuben, mac shinney Israel, (son eshyn by-hinney va, agh son wheesh as dy ren eh aggair da lhiabbee e ayrey, va cairys e eiraght er ny choyrt da mec Yoseph, mac Israel: as cha vel coontey ny sheelogheyn oc dy ve er ny ghoaill cordail rish nyn ruggey. 2As ghow Judah raad jeh e vraaraghyn, as jehsyn haink yn ard-er-reill; agh va cairys yn eiraght lesh Joseph:) 3Mec Reuben, mac shinney Israel va, Hanoch, as Pallu, Hezron, as Carmi. 4Mec Joel; Shemaiah e vac, Gog e vac, Shimei e vac, 5Micah e vac, Reaia e vac, Baal e vac, 6Beerah e vac, hug Tiglath-pileser ree Assyria lesh ersooyl ayns cappeeys: eshyn va prince ny Reubeniteyn. 7As jeh e vraaraghyn rere nyn gynneeyn, (tra va coontey ny sheelogheyn oc er ny ghoaill) ny ard-gheiney va, Jeiel, as Zechariah, 8As Bela mac Azaz, mac Shema, mac Joel, va cummal ayns Aroer, eer gys Nebo, as Baal-meon. 9As lesh y shiar, va e chummal gys oirr yn aasagh, veih awin Euphrates: son dy row’n maase oc er ny vishaghey ayns cheer Ghilead. 10As rish lhing Saul, ren ad caggey rish ny Hagariteyn, huitt liorish nyn laueyn: as ren ad cummal ayns ny cabbaneyn oc trooid ooilley’n cheer shiar jeh Gilead.

11As ren cloan Ghad cummal harrish nyn ’oï, ayns cheer Vashan, gys Salcah: 12Joel yn ard-er, as Shaphan by-niessey da, as Jaanai, as Shaphat ayns Bashan. 13As ny braaraghyn oc jeh thie nyn ayrey va, Michael, as Meshullam, as Sheba, as Jorai, as Jachan, as Zia, as Heber, shiaght. 14Ad shoh cloan Abihail, mac Huri, mac Jaroah, mac Ghilead, mac Michael, mac Jeshishai, mac Jahdo, mac Buz, 15Ahi mac Abdiel, mac Guni, yn ard-er jeh thie e ayrey. 16As ren ad baghey ayns Gilead ec Bashan, as ayns e ard-valjyn, as ayns ooilley ny baljyn-beggey mygeayrt Sharon, derrey ny cagliaghyn echey. 17V’ad shoh ooilley er nyn earroo, rere nyn gynneeyn, ayns laghyn Yotham ree Yudah, as ayns laghyn Yeroboam ree Israel.

18Mec Reuben, as ny Gaditeyn, as lieh-tribe Vanasseh, deiney dunnal, deiney aghtal dy loaghtey scape as cliwe, as dy lhiggey lesh y vhow, as schleioil ayns caggey, va kiare thousaneyn as da-eed shiaght cheead as three-feed, hie magh gys y chaggey. 19As ren ad caggey rish ny Hagariteyn, rish Jetur, as Nephish, as Nodab. 20As hooar ad y varriaght orroo, as va ny Hagariteyn er nyn livrey gys y laue oc, as ooilley ny va mâroo: son deïe ad gys Jee ayns y chaggey, as hug eh clashtyn daue, er-yn-oyr dy dug ad nyn marrant er. 21As ghow ad ersooyl nyn maase; jeh ny camelyn oc jeih thousaneyn as da-eed, as jeh ny kirree daa cheead as jeih as da-eed dy housaneyn, as jeh assylyn daa housane, as dy gheiney keead thousane. 22Son va ymmodee jeu er ny stroie, son va’n caggey veih Jee. As ren ad baghey ayns ny ynnydyn oc, derrey’n chappeeys.

23As ren cloan lieh-tribe Vanasseh cummal ayns y cheer: ren ad skeayley veih Bashan gys Baal-hermon, as Senir, as gys cronk Hermon. 24As v’ad shoh king thie nyn ayraghyn, eer Epher, as Ishi, as Eliel, as Azriel, as Jeremiah, as Hodaviah, as Jahdiel, deiney niartal caggee, deiney ooasle, as king thie nyn ayraghyn.

25As ren ad peccah noi Jee nyn ayraghyn, as hie ad er-shaghryn geiyrt er jeeghyn pobble y cheer, ren Jee y stroie kiongoyrt roo. 26As ren Jee Israel greinnaghey seose spyrryd Phul ree Assyria, as spyrryd Tiglath-pileser ree Assyria: as chur eh lesh ad ersooyl, (eer ny Reubeniteyn, as ny Gaditeyn, as y lieh-tribe Vanasseh) as hoie eh ad ayns Halah, as Habor, as Hara, as choud’s awin Gozan, gys y laa t’ayn jiu.