CAB. I

1Paul eït dy ve Ostyl Yeesey Creest, liorish aigney Yee, as Sosthenes nyn mraar, 2Gys agglish Yee ta ec Corinth, hucsyn t’er nyn gasherickey ayns Creest Yeesey, er nyn eam dy ve nyn nooghyn mâroosyn ooilley ta ayns dy chooilley ynnyd geamagh er ennym Yeesey Creest, chammah yn Chiarn ocsyn as ainyn. 3Grayse dy row hiu, as shee veih Jee nyn Ayr, as veih yn Chiarn Yeesey Creest. 4Ta mee cur booise da my Yee dy kinjagh ayns y lieh eu, son grayse Yee t’er ny choyrt diu ayns Yeesey Creest; 5Son dy vel shiuish ayns dy chooilley nhee dy palchey er nyn yannoo magh liorishyn ayns dy chooilley ghlare, as ayns dy chooilley hushtey; 6Dy jarroo myr va recortys Chreest er ny hickyraghey ny-vud eu: 7Myr shen nagh vel shiu cheet ergooyl ayns gioot erbee; farkiagh son cheet y Chiarn Yeesey Creest; 8Nee myrgeddin shiuish y niartaghey gys y jerrey, dy vod shiu ve gyn loght ayns laa nyn Jiarn Yeesey Creest. 9Ta Jee firrinagh, liorish va shiu er nyn eam gys sheshaght e Vac Yeesey Creest nyn Jiarn. 10Nish ta mee guee erriu, vraaraghyn, liorish ennym nyn Jiarn Yeesey Creest, dy bee shiu ooilley er yn un ockle, as nagh bee streeuaghyn ny mast’ eu; agh dy bee shiu sniemmit cooidjagh ’syn un aigney, as ’syn un smooinaght. 11Son te er ny ve soilshit dooys mychione eu, my vraaraghyn, lioroosyn jeh lught-thie Chloe, dy vel streeuaghyn nyn mast’ eu. 12As shoh ta mee dy ghra, dy vel fer as fer j’iu gra, Ta mish son Paul, as mish son Apollos, as mish son Cephas, as mish son Creest. 13Vel Creest er ny rheynn [ayns ayrnyn]? row Paul er ny chrossey er ny son eu? ny row shiu er nyn mashtey ayns ennym Phaul? 14Ta mee cur booise da Jee, nagh ren mee veg eu y vashtey, agh Crispus as Gaius: 15Nagh beagh oyr ec fer erbee dy ghra, dy vasht mee ayns m’ennym hene. 16As ren mee bashtey myrgeddin lught-thie Stephanas: er-lhimmey jeu shoh, cha s’aym vasht mee unnane erbee elley. 17Son cha row eh [wheesh] er my churrym veih Creest dy vashtey, as dy phreacheil yn sushtal: cha nee lesh creenaght goan, er-aggle dy beagh crosh Chreest gyn veg y vree. 18Son ta preacheil y chrosh ommijys dauesyn ta cherraghtyn; agh dooinyn t’er nyn sauail te pooar Yee. 19Son te scruit, Ver-yms mow creenaght y vooinjer chreeney, as ver-ym lhiam gys veg keeayll y vooinjer cheeayllagh. 20Cre vel y dooinney creeney? cre vel y scrudeyr? cre vel pleadeyr y theihll shoh? nagh vel Jee er n’yannoo creenaght y theihll shoh dy ve ommijys? 21Son fakin ayns creenaght Yee, nagh dug y seihll liorish creenaght enney er Jee, ve aigney Yee liorish ommijys preacheil dy hauail adsyn ta credjal. 22Son ta ny Hewnyn shirrey cowrey, as ny Greekyn jeeaghyn son creenaght: 23Agh ta shinyn preacheil Creest v’er ny chrossey, da ny Hewnyn, scammylt, as da ny Greekyn, ommijys; 24Agh dauesyn t’er nyn eam, chammah Hewnyn as Greekyn, Creest pooar Yee, as creenaght Yee. 25Son ta shen t’adsyn genmys ommijys Yee ny s’creeney na deiney; as annooinid Yee ny s’troshey na deiney. 26Son ta shiu fakin, vraaraghyn, cre gys ta shiu er nyn eam, kys nagh nee ymmodee deiney creeney lurg yn eill, nagh nee ymmodee deiney pooaral, nagh nee ymmodee deiney ooasle t’er nyn eam. 27Agh ta Jee er reih reddyn ommijagh y theihll, dy choyrt fo-chosh ny reddyn creeney; as ta Jee er reih reddyn faase y theihll, dy naaraghey ny reddyn niartal; 28As reddyn fardalagh y theihll, as reddyn nagh vel soiagh jeant jeu, ta Jee er reih, as reddyn nagh vel, dy chur mow ny reddyn t’ayn: 29Nagh jinnagh dooinney erbee boggyssagh ayns yn enish echeysyn. 30Agh jehsyn ta shiuish ayns Creest Yeesey eshyn ta liorish Jee er ny yannoo dooinyn creenaght, as cairys, as casherickys, as livrey-ys: 31Son, myr te scruit, Eshyn ta boggyssagh, lhig da boggyssagh, ayns y Chiarn.