CAB. X

1Ny-sodjey, vraaraghyn, cha baillym shiu ve neu-hushtagh, kys dy row ooilley ny ayraghyn ain fo’n vodjal, as hie ad ooilley trooid yn aarkey; 2As v’ad ooilley bashtit gys Moses ayns y vodjal, as ayns yn aarkey; 3As ren ad ooilley gee yn beaghey spyrrydoil cheddin; 4As ren ad ooilley giu yn jough spyrrydoil cheddin: (son ren ad giu jeh’n Chreg spyrrydoil shen deiyr orroo; as y Chreg shen va Creest.) 5Agh jeh ymmodee jeu cha row Jee feer wooiagh; son v’ad er nyn goyrt mow ayns yn aasagh. 6Nish va ny reddyn shoh son sampleyryn dooinyn, son nagh jinnagh shin saynt da nheeghyn olk, myr hug adsyn neesht saynt. 7Chamoo cur-jee shiuish ooashley da jallooyn, myr hug paart jeusyn; myr te scruit, Hoie yn pobble sheese dy ee as dy iu, as dirree ad seose dy ve rouanagh. 8Chamoo lhig dooin cur rish maarderys, myr ren paart jeusyn, as huitt ad ayns un laa three thousaneyn as feed. 9Chamoo lhig dooin Creest y vrasnaghey, myr ren paart jeusyn myrgeddin brasnaghey, as v’ad er nyn stroie liorish ard-nieughyn. 10Chamoo jean shiuish tallagh, myr ren paart jeusyn neesht tallagh, as v’ad er nyn stroie liorish y stroider. 11Nish haink ooilley ny reddyn shoh orroosyn son sampleyryn: as t’ad scruit son raaue dooinyn, orrin ta jerrey’n theihll er jeet. 12Shen-y-fa lhig dasyn ta smooinaghtyn dy vel eh ny hassoo, kiarail y ghoaill nagh duitt eh. 13Cha vel miolagh erbee er jeet nyn raad, agh lheid as ta cadjin da dooinney: agh ta Jee firrinagh, nagh lhig diuish dy ve er nyn miolaghey erskyn ny oddys shiu y ymmyrkey; agh nee eh myrgeddin lesh y violagh raad y yannoo dy scapail, dy vod niart y ve ayndiu dy ymmyrkey eh. 14Shen-y-fa my chaarjyn deyr, chea-jee veih coyrt ooashley da jallooyn. 15Ta mee loayrt myr rish deiney creeney: briwnys-jee hene ny ta mee dy ghra. 16Yn cappan dy vannaght ta shin dy oltaghey, nagh nee shoh dy ghoaill ayrn jeh fuill Chreest? Yn arran ta shin dy vrishey, nagh nee shoh dy ghoaill ayrn jeh corp Chreest? 17Son ta shinyn, ga ymmodee, un arran, as un chorp: son ta shin ooilley goaill ayrn jeh’n un arran shen. 18Cur-jee my-ner Israel cordail rish yn eill: nagh vel adsyn ta gee jeh ny ourallyn, goaill ayrn jeh ny t’er ny hebbal er yn altar? 19Cre jir-ym eisht? dy vel jalloo veg edyr, ny dy vel shen ny ta er ny ouralley gys jallooyn veg edyr? 20Agh ta mee gra, dy vel ny ourallyn ta ny Ashoonyn-quaagh dy hebbal, chebbit gys drogh-spyrrydyn, as cha nee gys Jee: as cha baillym shiu dy ghoaill commee marish drogh-spyrrydyn. 21Cha vod shiu giu jeh cappan y Chiarn, as jeh cappan drogh-spyrrydyn: cha vod shiu ayrn y ghoaill ec boayrd y Chiarn, as ec boayrd drogh-spyrrydyn. 22Vel shin brasnaghey yn Chiarn gys corree? vel shin ny s’troshey na eshyn? 23Te lowal dou ymmodee reddyn y yannoo, agh cha vel dy chooilley nhee cooie dy ve jeant: te lowal dou ymmodee reddyn y yannoo, agh cha vel dy chooilley nhee gys ynsagh Creestee. 24Ny lhig da dooinney erbee shirrey ynrycan e vondeish hene: agh dy chooilley unnane foays e naboo. 25Cre-erbee ta creckit ayns ny margaghyn, ee-jee, fegooish jannoo briaght erbee er graih cooinsheanse. 26Son lesh y Chiarn yn seihll, as ooilley ny t’ayn. 27My ta fer erbee jeusyn nagh vel jeh’n chredjue, cuirrey shiu gys gien, as shiuish aignagh dy gholl; cre-erbee ta soit kiongoyrt riu, ee-jee, fegooish jannoo briaght erbee er graih cooinsheanse. 28Agh my jir dooinney erbee riu, va shoh er ny hebbal ayns oural gys jallooyn, ny ee-jee jeh er y choontey echeysyn ren shoh y hoilshaghey, as er graih cooinsheanse. Son ta’n seihll lesh y Chiarn, as ooilley ny t’ayn. 29Cooinsheanse, ta mee gra, cha nee dty chooinsheanse hene, agh shen jeh’n fer elley: son cre’n-fa ta my reamys er ny vriwnys liorish cooinsheanse ghooinney elley? 30Son, my ta mee liorish grayse goaill ayrn jeh, cre’n-fa ta mee oltooanit son shen ny ta mee er oltaghey? 31Shen-y-fa edyr shiu ve gee ny giu, ny cre-erbee ta shiu dy yannoo, jean-jee ooilley gys gloyr Yee. 32Ny cur-jee oyr erbee dy huittym ayns peccah, edyr da ny Hewnyn, ny da ny Ashoonyn-quaagh, ny da agglish Yee: 33Dy jarroo myr ta mee son booiys dy chooilley ghooinney ayns dy chooilley nhee, cha nee shirrey my vondeish hene, agh vondeish ymmodee, dy vod ad v’er nyn sauail.