CAB. XI

1Eiyr-jee shiuish orrym’s, dy jarroo myr ta mish myrgeddin er Creest. 2Nish ta mee moylley shiu, vraaraghyn, dy vel shiu cooinaghtyn orrym ayns dy chooilley nhee, as freayll ny oardaghyn myr livrey mee ad diu. 3Agh baillym shiu dy hoiggal dy nee Creest kione dy chooilley ghooinney; as y dooinney kione e ven; as dy nee Jee kione Chreest. 4Dy chooilley ghooinney ta jannoo padjer ny phadeyrys, as e chione coodit, t’eh naaraghey e chione. 5Agh dy chooilley ven ta goaill padjer ny jannoo phadeyrys, as e kione rooisht, t’ee naaraghey e kione: son ta shen yn un chooid as dy beagh ee er ny ve baarit. 6Son mannagh vel coodagh er y ven, lhig j’ee chammah ve baarit: agh my te nearey da ben dy ve baarit ny shavit, lhig da coodagh ’ve urree. 7Er son y dooinney dy jarroo cha lhisagh eh e chione y choodaghey, ayns wheesh as dy vel eh co-chaslys as gloyr Yee: agh ta’n ven gloyr y dooinney. 8Son cha row yn dooinney veih’n ven: agh y ven veih’n dooinney. 9Chamoo va’n dooinney er ny chroo son y ven: agh y ven son y dooinney. 10Son yn oyr shoh lhisagh v’ec y ven coodagh er e kione, er coontey ny ainleyn. 11Ny-yeih, cha vel y dooinney fegooish y ven, chamoo ta’n ven fegooish y dooinney ayns y Chiarn. 12Son myr va’n ven veih’n dooinney, myr shen dy jarroo ta’n dooinney liorish y ven: agh ta dy chooilley nhee veih Jee. 13Jean-jee hene briwnys; vel eh jesh da ben dy yannoo padjer gys Jee as y kione eck gyn coodagh? 14Nagh vel eer dooghys hene gynsaghey shiu, my ta dooinney ceau e olt gys lhiurid, te nearey da? 15Agh my ta folt liauyr er ben, te stoamid j’ee: son ta’n folt eck er ny choyrt j’ee son coodagh. 16Agh my saillish dooinney erbee ve streeuagh, cha vel lheid y cliaghtey ain, ny foast ec kialteenyn Yee. 17Nish ayns y red shoh ta mee dy hoilshaghey diu, cha vel mee dy voylley shiu; dy vel shiu cheet cooidjagh, cha nee son ny share agh son ny smessey. 18Son hoshiaght ooilley, tra ta shiu cheet cooidjagh ayns y cheeill, ta mee clashtyn dy vel streeuaghyn nyn mast’ eu; as ayns ayrn ta mee credjal eh. 19Son shegin da myrgeddin shaghrynys veih’n chredjue ve ny-vud eu, dy vod adsyn ta firrinagh ayns y chredjue v’er nyn gronnaghey nyn mast’ eu. 20Tra ta shiu cheet cooidjagh er-y-fa shen gys un voayl, cha vel eh dy ee shibber y Chiarn. 21Son ec gee, ta dagh unnane goaill roish fer elley e hibber hene: as ta fer accryssagh, as ta fer elley er n’iu dy palchey. 22Cre, nagh vel thieyn eu dy ee as dy iu ayndoo? ny nee beg ta shiu soiaghey jeh keeill Yee, as naaraghey adsyn nagh vel thieyn oc? Cre nee’m y ghra riu? jean-ym shiu y voylley ayns shoh? Cha vel mee moylley shiu. 23Son ta mish er n’gheddyn veih’n Chiarn shen ta mee myrgeddin er livrey diuish, Dy ren y Chiarn Yeesey, yn oie cheddin ayn v’eh er ny vrah, arran y ghoaill: 24As tra v’eh er choyrt booise, vrish eh eh, as dooyrt eh, Gow-jee, ee-jee; shoh my chorp’s t’er ny vrishey er nyn son eu: jean-jee shoh ayns cooinaghtyn jeem’s. 25Er yn aght cheddin neesht ghow eh yn cappan, tra v’eh erreish shibber, gra, She’n cappan shoh yn conaant noa ayns my uill’s: shoh jean-jee, cha mennick as iu-ys shiu eh, ayns cooinaghtyn jeem’s. 26Son cha mennick as ee-ys shiu yn arran shoh, as iu-ys shiu yn cappan shoh, ta shiu soilshaghey magh baase y Chiarn derrey hig eh. 27Shen-y-fa, quoi-erbee ee-ys yn arran shoh, as iu-ys y cappan shoh jeh’n Chiarn dy neu-feeu, bee eh oolee jeh corp as fuill y Chiarn. 28Agh lhig da dooinney eh-hene y eysht; as myr shen lhig da gee jeh’n arran shen, as giu jeh’n chappan shen. 29Son eshyn ta gee as giu dy neu-feeu, t’eh gee as giu kerraghey da hene, fegooish cur tastey da corp y Chiarn. 30Son yn oyr shoh ta ymmodee annoon as doghanagh ny-vud eu, as ymmodee nyn gadley. 31Son dy jinnagh shin shin-hene y vriwnys, cha beagh shin er nyn mriwnys. 32Agh tra ta shin er nyn mriwnys, ta shin er nyn smaghtaghey liorish y Chiarn, dy vod mayd gyn ve deyrit marish y seihll. 33Shen-y-fa, my vraaraghyn, tra ta shiu cheet cooidjagh dy ee, fuirree-jee yn derrey yeh son y jeh elley. 34As my ta dooinney erbee accryssagh, lhig eh gee ec y thie; nagh jig shiu cooidjagh gys deyrey. Er son reddyn elley nee’m ad y oardrail tra hig-ym.