CAB. XII

1Nish mychione giootyn spyrrydoil, vraaraghyn, cha baillym shiu ve mee-hushtagh. 2Ta fys eu dy row shiu nyn Ashoonyn-quaagh, er nyn goyrt lhieu ersooyl gys ny jallooyn balloo shoh, dy jarroo myr va shiu er nyn leeideil. 3Shen-y-fa ta mish soilshaghey diu, nagh vel dooinney erbee ta loayrt liorish Spyrryd Yee, genmys Yeesey mollaghtagh: as nagh vod dooinney erbee gra dy nee Yeesey yn Chiarn, agh liorish y Spyrryd Noo. 4Nish ta ayn caghlaaghyn dy ghiootyn, agh y Spyrryd cheddin. 5As ta caghlaaghyn dy oikyn ayn, agh y Chiarn cheddin. 6As ta ayn caghlaaghyn dy obbraghyn mirrilagh, agh she’n Jee cheddin ta gobbraghey ooilley ayns ooilley. 7Agh ta soilshey yn Spyrryd er ny choyrt da dy chooilley ghooinney son vondeish ennagh. 8Son da fer ta er ny choyrt liorish y Spyrryd, yn goo dy chreenaght; da fer elley yn goo dy hushtey liorish y Spyrryd cheddin; 9Da fer elley credjue liorish y Spyrryd cheddin; da fer elley ny giootyn dy lheihys liorish y Spyrryd cheddin; 10Da fer elley dy obbraghey mirrilyn; da fer elley phadeyrys; da fer elley yn briwnys dy phrowal ny spyrrydyn; da fer elley caghlaaghyn dy ghlaraghyn; da fer elley dy chur bun er glaraghyn. 11Agh ad shoh ooilley ta’n un as yn eer Spyrryd cheddin gobbraghey, rheynn er dy chooilley ghooinney er-lheh myr saillish hene. 12Son ’naght myr ta’n corp unnane, as e oltyn ymmodee, as nagh vel ooilley oltyn yn un chorp shen, ga ymmodee, jannoo agh un chorp: er yn aght cheddin ta Creest. 13Son liorish un Spyrryd ta shin ooilley er nyn mashtey ayns un chorp, edyr shin ve Hewnyn ny Ashoonyn-quaagh: edyr shin ve kianlt ny seyr: as ta shin ooilley er n’iu ayns yn un Spyrryd. 14Son cha vel y corp un olt, agh ymmodee. 15My jir y chass, Er-yn-oyr nagh nee mish y laue, cha vel mee jeh’n chorp; nagh vel eh son shen jeh’n chorp? 16As my jir y chleaysh, Er-yn-oyr nagh nee yn tooill mee, cha vel mee jeh’n chorp; nagh vel eh son shen jeh’n chorp? 17Dy beagh yn slane corp ny hooill, cre’n raad veagh y clashtyn? as dy beagh yn slane corp ny chlashtyn, cre’n raad veagh y soaral? 18Agh nish ta Jee er hoiaghey ny oltyn, dagh unnane oc ayns y chorp, myr s’gooidsave lesh hene. 19As dy beagh ad ooilley un olt, cre veagh y corp? 20Agh nish t’ad ymmodee oltyn, agh ny-yeih un chorp. 21As cha vod y tooill gra rish y laue, Cha vel feme aym ort: ny reesht, yn kione rish ny cassyn, Cha vel feme aym erriu. 22Ny-sodjey na shoh, ta ny oltyn shen jeh’n chorp, s’melley ta shin coontey jeu, foast ymmyrchagh. 23As ny oltyn shen jeh’n chorp, sloo ta shin dy choontey jeu, orroo smoo dy stoamid ta shin dy stowal, as ny oltyn neu-yesh ain er nyn goamrey lesh onnor foddey smoo. 24Son cha vel ny oltyn aalin ain feme er shoh: agh ta Jee er chummey yn corp dy cheilley, coyrt ny smoo dy onnor da’n ayrn shen va laccal: 25Nagh beagh scarrey erbee ayns y chorp; agh dy beagh ec ooilley ny oltyn yn chiarail cheddin yn derrey yeh son y jeh elley. 26Son edyr un olt dy hurranse, ta ooilley ny oltyn surranse mârish: ny un olt dy v’er ny choamrey lesh onnor, ta ooilley ny oltyn goaill boggey mârish. 27Agh nish ta shiuish corp Chreest, as oltyn er-lheh. 28As ta Jee er hoiaghey paart ayns yn agglish, hoshiaght ostyllyn, ’sy nah ynnyd phadeyryn, ’sy trass ynnyd fir-ynsee, lurg shen mirrilyn, eisht giootyn dy lheihys, fir-choonee, reiltee, caghlaaghyn dy ghlare. 29Vel ooilley nyn ostyllyn? vel ooilley nyn vadeyryn? vel ooilley nyn vir-ynsee? vel ooilley gobbraghey mirrilyn? 30Vel ec ooilley ny giootyn dy lheihys? vel ooilley loayrt glaraghyn joarree? vel ooilley coyrt bun er glaraghyn? 31Agh yeearree-jee dy jeean ny ard-ghiootyn: As foast ta mee jeeaghyn diu raad foddey s’ooasle.